Hewlêr (Rûdaw) - Platforma Demokratên Kurd, PDK Bakur têkildarî îsrîfaya Şaredarê Pîran a Amedê Felat Aygoren ji Partiya Demokratîk a Gelan (HDP) de daxuyaniyek belav kir û ragihand, vekişîna Şaredarê Pîranê ji HDPê bi danûstandina li gel wê partiyê bûye.
PDK Bakur dibêje, di hilbijartinên herêmî yên 31ê Adara 2019an de “ji bo berjewendiya gelê xwe bi biryareke stratejîk û siyasî ligel çend partî û hêzên Kurdan me tifaqeke hilbijartinê pêk anî” û li ser çend “esasên siyasî û teknîkî” wan biryar da ku li çend bajar û navçeyan li ser lîsteya HDP bikevin hilbijartina Şaredariyan.
Di daxuyaniyê de tê gotin, li ser wê rêkeftinê namzedê PDK Bakurê Felat Aygoren, li ser lîsta HDPê bi rêjeya %51 bi serkeftî derçû û bû Şaredarê Pîranê.
PDK-Bakur amaje vekişîna Felat Aygoren ji HDPê dike û dibêje: “Bi çarçoveya danûstendina me ya dawîn a ligel HDP em bi hevra gihêştin wê qeneatê ku endamê me Şaredarê Pîranê Felat Aygoren ji lîsteya HDPê derkeve û bi ser navê PDK Platforma Demokratên Kurd (PDK-Bakur) xebata xwe berdewam bike.”
PDK Bakur herwiha bangawaziyê dike û dibêje: “Ji bo berjewendî û parastina destkeftiyên milletê Kurd û Kurdistanê, piştgirî bidin yekrêziya nav Kurdan, danûstendin û hevkariyan. Em pê bawerin emê serbikevin. Paşeroj ya me ye.”
Daxuyaniya PDK Bakurê bi vî awayî ye:
JI BO RAYA GIŞTÎ Û ÇAPEMENIYÊ RE
31ê Adar a 2019an de di hilbijartinên herêmî de ji bo berjewendiya gelê xwe bi biryareke stratejîk û siyasî ligel çend partî û hêzên Kurdan me tifaqeke hilbijartinê pêk anî. Li ser çend esasên siyasî û teknîkî me biryar da ku li çend bajar û navçeyan li ser lîsteya HDP bikevin hilbijartina Şaredariyan. Li ser wê rêkeftinê namzedê me Felat Aygoren bi rêjeya %51 bi serkeftî derçû û bû Şaredarê Pîranê. Li gor esasên tifaqa hilbijartina herêmî endamên me heta îro bi xebateke hevbeş û hemahengî bi endamên meclîsa Şaredariya Pîran ya HDPê re birêve dibin û ji vir şûnde jî wê ew hemahengî berdewam be.
Bi çarçoveya danûstendina me ya dawîn a ligel HDP em bi hevra gihêştin wê qeneatê ku endamê me Şaredarê Pîranê Felat Aygoren ji lîsteya HDPê derkeve û bi ser navê PDK Platforma Demokratên Kurd (PDK-Bakur) xebata xwe berdewam bike.
Çi pirsgirek navbeyna me û HDPê nîne. Em wek PDK Bakur girîngiyê didin têkilî û danûstendinan ligel partiyên siyasî, taybetî jî yekrêziya partiyên Kurd û Kurdistanî. Ji ber wê yekê biryara me ya stratejîk ya xebata yekrêziyê bi hêzên Kurd û Kurdistanî û hevkariya partiyên siyasî wê her berdewam be. Serok û endamên me yê Şaredariya Pîran bi hemû aliyên siyasî ya endamên meclîsê ya Şaredariya Pîran, bi birayane û wekhev nêzîk dibe û li ser vê esasê dixebite. Hemû xebatên me ji bo me ye. Ji ber wê jî em wek PDK Bakur li Pîranê ji bo hemû welatîyan dixebitin û wan bi dil û can himbêz dikin.
Ji ber çend gotegotan û agahiyên şaş me pêwîstiya vê ronkirinê dît.
Em wek PDK Bakur bangawaziyê gelê xwe dikin û têkez dikin;
Ji bo berjewendî û parastina destkeftiyên milletê Kurd û Kurdistanê, piştgirî bidin yekrêziya nav Kurdan, danûstendin û hevkariyan.
Em pê bawerin emê serbikevin. Paşeroj ya me ye.
18/08/2020
PDK Bakur (Platforma Demokratên Kurd)
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse