2 xort di Çemê Êlihê de winda bûn

Navenda Nûçeyan – 2 xortên bi navê Ercan Eripek û Serkan Kurun di nav Çemê Malabadê yê li Êlihê de winda bûn.

Sê xortên bi navên Ercan Eripek ku 15 salî ye, Serkan Kurun ku 17 salî ye û Emrullah Eripek ku 16 salî ye, ji bo masiyan çûn Çemê Malabadê yê Êlihê.

Her sê xort di dema zeftkirina masiyan de lingên wan şiqitîne û ketine ber avê.

Xortê bi navê Emrullah Eripek xwe ji avê rizgar kiriye, lê Ercan Eripek û Serkan Kurun di nav avê de winda bûne.

Emrullah Eripek bang li welatiyên derdorê kiriye û welatiyan jî gazî polîs û ambulansan kirine.

Ji ber ku tîma pispor ên lêgerîn û rizgarkirinê li bajarê Êlihê tinebûye, hin welatiyan dest bi lêgerîn û rizgarkirina xortan kirine.

Osman Eripek ku bavê Ercan Eripek e, ji ber nebûna tîma pispor a rizgarkirinê bertek nîşan da û got: “Bi saetan e em nikarin du xortên ku di nav avê de winda bûne bibînin. Welatî ketin avê, lê hêj nedîtin. Em li benda polîsên pispor ên melevaniyê yên Bedlîs û Tetwanê ne. Ev ji bo Êlihê şerm e.”

Xizmên xortên ku li Çemê Malabadê winda bûn, ji bo lêgerîn û rizgarkirinê li benda tîma pispor in.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger