Li Xoyê erd hejiya: Herî kêm 30 kes birîndar bûn
Hewlêr (Rûdaw) – Qaymeqamê Xoy a ser bi Urmiyê ve ragihand ku di encama erdheja duh de herî kêm 30 kes birîndar bûne.
Li Xoy a ser bi Urmiye ya Rojhilatê Kurdistanê roja Şemiyê 17ê Hezîrana 2023an erdhejeke bi pileya 4.7 rû da.
Qaymeqamê Xoyê Zabihullah Kazimî îro Yekşemê ragihand, di dema erdhejê de xelk reviyaye derve û herî kêm 30 kes birîndar bûne.
Zabihullah Kazimî diyar kir ku ziyan negihiştiye dezgehên sereke yên weke elektrîk, gaz û avê û rewşa bajêr asayî ye.
Li Xoyê di çend mehên borî de çendîn caran erd hejiya
Di 18ê Çileya 2023an de erdhejek çêbû û 252 kes birîndar bûn û 3 hezar û 850 xanî û avahiyan zirar dîtin.
Her wiha di 28ê Çileya 2023an de jî erdhejek li herêmê rû da û di encamê de 3 kesan canê xwe ji dest dan û hezar û 100 kes jî birîndar bûn.
Li gor amarên Rêveberiya Avahîsaziyê ya Urmiyê di wê erdhejê de zêdetirî 13 hezar xaniyan ziyan dîtine yan jî hilweşiyane.
Destpêka payîza par jî di erdhejekê de hezar û 126 kes birîndar bûn û 5 hezar û 100 xaniyan jî zirar dîtin.