Hewlêr (Rûdaw) - Serokê Herêma Kurdistanê pêşwaziya Balyozê Îtalyayê Iraqê kir û ragihand ku, di peywendiyên Hewlêr û Bexdayê de atmosfereke erênî ava bûye û got "Pêngavên ku hikûmeta federal a Iraqê heta niha avêtine cihê hêvî û kêfxweşiyê ye."
Îro Serokê Herêma Kurdistanê Nêçîrvan Barzanî pêşwaziya Balyozê Îtalyayê Iraqê Maurizio Greganti kir.
Serokatiya Herêma Kurdistanê di daxuyaniyekê de ragihand, her du aliyan behsa pêwendiyên navbera Iraq û Herêma Kurdistanê ligel Îtalya, pêwendiyên Hewlêr û Bexdayê û çareserkirina pirsgirêkên di navbera wan de kirin.
Serokê Herêma Kurdistanê spasiya piştevaniya Îtalya bo Iraq û Herêma Kurdistanê kir û got, ji bo çareserkirina pirsgirêkan di navbera Bexda û Hewlêrê de atmosfereke erênî ava bûye û got "Pêngavên ku hikûmeta federal a Iraqê heta niha avêtine cihê hêvî û kêfxweşiyê ye."
Nêçîrvan Barzanî tekez kir ku Bexda "hevparê sereke yê Herêma Kurdistanê ye û ji xeynî çareserkirina pirsgirêkan ti rêyeke din" li ber hikûmeta Herêma Kurdistanê û hikûmeta Iraqê nîne.
Balyozê Îtalya li Iraqê civîna navbera Nêçîrvan Barzanî û Wezîrê Derve yê wî welatî di meha Sibatê de li konferansa Munchenê bi erênî nirxand û got: “Çareserkirina kêşeyên di navbera Hewlêr û Bexdayê de dê civaka navdewletî zêdetir berê xwe bide Iraq û Herêma Kurdistanê û dê derfeta veberhênanên biyanî li Iraq û Herêma Kurdistanê zêdetir bike.
Serokatiya Herêma Kurdistanê di daxuyaniyê de ragihand ku di beşeke din ya civînê de behsa çalakiyên Îtaliyayê yên li Îraq û Herêma Kurdistanê, rewşa navçeyê bi giştî û çendîn mijarên ku di berjewendiya hevbeş de ne, hatin gotûbêjkirin ku konsulê Îtalyayê yê li herêma Kurdistanê jî tê de amade bû.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse