Hewlêr (Rûdaw) – Parlamentêrê Partiya Demorkata Kurdistanê (PDK) Hêmin Hewram ku wek Cîgirê Yekem ê Serokê Parlamentoya Herêma Kurdistanê hat hilbijartin, ragihand ku kursiyê serokê Parlemantoya Kurdistanê para Yekîtiya Niştîmanî ya Kurdistanê (YNK) ye.
Parlemantoya Kurdistanê îro Duşemê (18.02.2019) civiya û di civînê de desteya nû ya Serokatiya Parlamentoya Kurdistanê hat hilbijartin.
Berbijêra PDKê, Vala Ferîd bi 64 dengan weke Seroka Parlamentoya Kurdistanê hate hilbijartin, herwiha berbijêrê PDKê Hêmin Hewramî weke Cîgirê Yekem û parlamentera Partiya Reform a Tirkmenî Muna Qehwecî weke Cîgira Duyem a serokê parlamentoyê hatin hilbijartin.
Li gor encamên dengdanê, Vala Ferîd bi 64 dengan bû Seroka Parlamentoyê, Hêmin Hewramî bi 68 dengan weke Cîgirê Yekem û Muna Qehwecî ku parlemantereke Turkman e, bi 60 dengan weke Cîgira Duyem hatin hilbijartin.
Hêmin Hewramî li parlemantoyê got: “Kursiyê serokê Parlemantoya Kurdistanê para YNKê ye, lê heta ku PDK û YNK li hev bikin, dê Dr. Vala Ferîd serok parlemantoyê be û dema ku lihevkirin çêbû û YNK di civîna parlemantoyê de beşdar bibe, dê kesek ji YNKê bibe serokê parlemantoyê.”
Piştî hilbijartina Desteya Serokatiya Parlementoya Herêma Kurdistanê, civîna parlamentoyê bi dawî hat.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse