Hewlêr (Rûdaw) – Li navçeya Xurmatûyê ya parêzgeha Kerkûkê bombeyek bi Hêza Hevbeş de teqiya, 2 fermandarên Pêşmergeyan û nobedarek şehîd ketin.
Li navçeya Xurmatûyê ya parêzgeha Kerkûkê ya Başûrê Kurdistanê bombeyeke ku berê hatiye çandin bi Lîwaya Yekê ya Hevbeş a hêzên Pêşmergeyan û artêşa Îraqê de teqiya.
Çavkaniyekî ji hêzên Pêşmergeyan ji Rûdawê re ragihand:
“Îro danê sibehê saet 09:00an li herêma Xereyê ya Xurmatûyê ji ber teqîna bombeyeke çandî ya di nava Lîwaya Yekê ya Hevbeş a hêzên Pêşmergeyan û artêşa Îraqê de 2 fermandarên bi navê Saman û Mihemed tevî nobedarekî xwe şehîd ketin û 3 nobedar jî birîndar bûn.”
Wî çavkaniyî her wiha da zanîn:
“Bombe bi wesayîteke zirxî ya Pêşmergeyan de teqiyaye û bi îhtimaleke mezin ji aliyê çekdarên DAIŞê ve hatiye çandin.”
Wezareta Pêşmergeyan jî li ser teqînê daxuyaniyek da û got:
“Bombeyeke çandî bi karwanê otomobîlên Fermandariya Fewca 3yan a Lîwaya Yekê ya Hevbeş a hêzên Pêşmergeyan û artêşa Îraqê de teqiya.
Di teqînê de Fermandar Saman Sabir Silêman, Fermandar Mihemed Reza Kerîm û efser Şerîf Ehmed Mihemedemîn şehîd ketin.
Her wiha 3 leşker jî birîndar bûn.”
Wezaretê li ser awayê teqînê jî anî ziman:
“Di encama lêkolîna herêmeke berfireh a ewlehiyê de teqîn çêbûye.”
Wezareta Parastinê ya Îraqê ji bo otopsiyê cenazeyên Pêşmergeyên şehîd birine Bexdayê û dê heta 2-3 rojan vegerîne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse