Parêzerê ji Kobanî Mihemed Etî hat berdan

17-10-2020

Hewlêr (Rûdaw) - Parêzer Mihemed Etî piştî 2 rojan ji girtin wî li Kobanî serbest hate berdan.

Parêzer Mihemed Etî ji Rûdawê re got, îro Şemiyê ew serbest hatiye berdan û vegeriyaye nav malbata xwe li gundê Til Xezalê.

Mihemed Etî got, ku di dema girtina wî de, ti zilm û zor li wî nebûye û bi rêz reftar li gel wî hatiye kirin, lê belê sedema desteserkirina xwe aşkere nekir.

Roja Pêncşema bihorî 15ê Cotmehê, parêzer Mihemed Etî ji aliyê hêzên ewlehiyê yên Rêveberiya Xweser a Rojavayê Kurdistanê ve hatibû girtin.

Dost û ximzên parêzer Mihemed Etî pêştir li ser torên civakî gotibûn, ji ber ku dozeke wî li Dadgehên Rêveberiya Xweser biser ketiye û wî daxwaza cîbicîkirina biryara dadgehê dikir, lê aliyê din bi biryara dadgehê razî nebûye û xwestiye bi vî şêweyî Mihemed Etî biêşînin.