Hewlêr (Rûdaw) - Li bajarê Bedlîsê yê Bakurê Kurdistanê, bi biryara Serokomariya Tirkiyê dê 300 dukan û xaniyên nêzîkî Çemê Bedlîsê bêne rûxandin.
Li gor biryarê, zevî û cihê wan dukan û xaniyan dê bikevin ser mulkê giştî û xwediyên wan jî dê ji aliyê hikûmeta Tirkiyê ve bêne qerebûkirin.
Birêveberiya Jîngeh û Bajêrvaniya Bedlîsê, niha dest bi valakirina cihên derdora Çemê Bedlîsê kirine û xwediyên wan mulkan haydar kirine, ku cihên xwe vala bikin û paşê ew dê bêne qerebûkirin.
Lê li aliyekê din xwediyên wan cihan ji qerebûkirinê dilgiran in û dibêjin, ku proseya qerebûkirinê bi awayekî dadmend nehatiye encamdan û nerazîbûn xwe nîşan dane.
Li gorî zaniyariyan, ji sedî 90ê xwediyên wan dukanan nerazî ne li ser awayê qerebûkirinê û weke ew dibêjin, beşekî xwediyên dukanan bi rêjeya ji sedî 10 û hinekên din bi rêjeya ji sedî 100 û hinekên din bi rêjeya ji sedî 500 têne qerebûkirin.
Hejmarek din ji xwediyên wan dukanan dibêjin, rast e biryara valakirina cihên wan hatiye dayîn, lê hikûmetê ti cihekî din ji bo wan dabîn nekiriye, ku ew bikaribin bazara xwe ya nû li wê derê vekin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse