Serokatiyê naveroka civîna Nêçîrvan Barzanî û Erdogan eşkere kir
Hewlêr (Rûdaw) - Serokê Herêma Kurdistanê û Serokkomarê Tirkiyeyê li ser aramiya herêmê û xurtkirina pêwendiyên di navbera Îraq, Tirkiye û Herêma Kurdistanê de axivîne.
Serokê Herêma Kurdistanê Nêçîrvan Barzanî ji bo serdaneke fermî çû Enqereya paytexta Tirkiyeyê.
Nêçîrvan Barzanî û Serokkomarê Tirkiyeyê Recep Tayyîp Erdogan li Enqereyê li hev civiyan.
Serokatiya Herêma Kurdistanê li ser serdana Nêçîrvan Barzanî ya Enqereyê daxuyaniyek belav kir.
Serokatiyê di daxuyaniyê de ragihand:
“Her du aliyan tekezî li ser bipêşxistina pêwendiyên Tirkiyeyê yên bi Îraq û Herêma Kurdistanê re bi taybetî di warê aborî de kir.
Li ser zêdekirina asta danûstandinên bazirganî, derfetên kar û sermayeguzariyên Tirkiyeyê yên li herêmên cuda yên Îraq û Herêma Kurdistanê gotûbêj hatin kirin.”
Di daxuyaniyê de hat destnîşankirin:
“Serokkomarê Tirkiyeyê tekezî li ser berdewamiya hevkariyên welatê xwe yên bi Îraq û Herêma Kurdistanê re kir.
Her wiha amadehî û daxwaza sektora taybet a ji bo kar û veberhênana li herêmên cuda û di warên cuda de nîşan da.”
Yek ji mijarên hevdîtinê jî rewşa ewlehiya herêmê bû.
Di beşeke din a hevdîtinê de, her du aliyan dilgiraniya xwe ya li ser rewşa aloz a Rojhilata Navîn û metirsî û encamên muhtemel ên li ser herêmê anî ziman.
Her du aliyan her wiha pêwendiyên Hewlêr û Bexdayê, Projeya Rêya Bipêşketinê, pêwendiyên Îraq û Herêma Kurdistanê yên bi welatên herêmê re, metirsiya terorê û şerê li dijî DAIŞê gotûbêj kirin.