Li Herêma Kurdistanê 14 hezar km rê hatin çêkirin û tamîrkirin

Hewlêr (Rûdaw) – Li Herêma Kurdistanê di nav çend salên borî de 14 hezar kîlometre rê hatin çêkirin û tamîrkirin.

Standardnebûna rêyan û pabendnebûna bi rênumayên trafîkê, wisa kiriye ku salane bi sedan welatî di rêyên Başûrê Kurdistanê de jiyana xwe ji dest didin.

Siyasetên çewt ên hikûmeta Beisê wisa kiriye ku di 27 salên borî de Hikûmeta Herêma Kurdistanê neçar bû ku herî zêde ji bo wê sektorê budce terxan bike. Li gor gotina berpirsên sektora rêyan, zêdetirî 14 hezar kîlometre rê di çend salên borî de hatine çêkirin yan jî hatine nûjenkirin.

Rêyên Herêma Kurdistanê pêwîstiya wan bi baştirkirinê heye, her sal ji ber bûyerên trafîkê bi dehan kes jiyana xwe ji dest didin. Şerên hikûmeta berê ya Iraqê ya bi serokatiya Sedam Husên û siyasetên wî yên li dijî xelkê Başûrê Kurdistanê bandoreke neyênî ya mezin li ser rêyên Herêma Kurdistanê kiriye.

Ji ber vê yekê, peywireke sereke ya Hikûmeta Herêma Kurdistanê piştî raperînê, tamîrkirina rêyan û çêkirina rêyên nû bû.

Projeyên rêyên Herêma Kurdistanê

Tamîrkirina rêyan nêzîkî 7000 km

Çêkirina rêyên bi yek xet nêzîkî 550 km

Çêkirina rêyên bi du xet nêzîkî 100 km

Çêkirina rêyên gundan nêzîkî 6500 km

Çêkirina piran nêzîkî 5700 metre çargoşe

Çêkirina tunelan nêzîkî 5834 metre çargoşe

Lê belê hêj pirsgirêkên mezin ên rêyên Herêma Kurdistanê hene û ji ber wê jî hatûçûna welatiyan zehmet dibe û gelek caran bûyerên trafîkê diqewimin.

Hilbijartinên xula pêncan a Parlementoya Kurdistanê roja 30ê Îlonê birêve diçe û welatiyan jî dixwazin berbijêrên ku di hilbijartinan de bi ser bikevin, pabendî sozên xwe bibin, ku yek ji wan sozan jî çareserkirina pirsgirêka rêyan e.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger