Hewlêr (Rûdaw) – Serokwezîrê Herêma Kurdistanê, êrişa Îranê ya îşev a li Hewlêrê bi tundî şermezar kir.
Supayan Pasdaran a Îranê îşev bi deh mûşekên balistîk êrişî çend deverên sivîl ên Hewlêrê kir û kesên sivîl bûn qurbaniya êrişê.
Serokwezîrê Herêma Kurdistanê Mesrûr Barzanî bi daxuyaniyekê êriş şermezar kir û ew êriş wekî "binpêkirina serweriya Herêma Kurdistanê û Îraqê" pênase kir.
"Em vê tawana li hemberî gelê Kurdistanê bi tundî şermezar dikin"
Mesrûr Barzanî got:
“Hewlêra serbilind careke din bûye armanca êrişên mûşekên Supaya Pasdaran a Îranê. Mixabin di encama vê êrişa nemerdane de sivîl şehîd ketin û birîndar bûn.
Ez hêvî dikim ku Xwedayê mezin şehîdan bi beheştê şad bike û di dema herî zû de silametiyê bide birîndaran.
Em vê tawana li hemberî gelê Kurdistanê bi tundî şermezar dikin.”
Serokwezîrê Herêma Kurdistanê herwiha bangî hikûmeta Bexdayê kir û got:
“Ez ji Hikûmeta Federal a Îraqê dixwazim helwesteke tund li beramberî binpêkirina serweriya Herêma Kurdistanê û Îraqê nîşan bide.”
Mesrûr Barzanî herwiha ji civaka navdewletî jî xwest ku li hemberî zordariya li ser xelkê Kurdistanê dengê xwe derxe û got:
“Di rojên pêş de em dê pêwendiyên xwe yên bi civaka navdewletî bidomînin da ku bi dawiyê li êrişên hovane yên li ser xelkê bêguneh ê Kurdistanê bîne.”
Dîmenên dema êrişa #Îran`ê ya bi mûşekan balistîk a li #Hewlêr`ê
— RudawKurdi (@RudawKurdi) January 16, 2024
Hergûliyên êrişê di vê raporê de bizane#Erbil #أربيل pic.twitter.com/TiLQXL0XAi
Çi bûbû?
Supaya Pasdaran a Îranê şeva borî derdora saet 23:30î bi deh mûşekan êrişî Hewlêrê kir û pênc ji van mûşekan li mala karsazê Kurd Pêşrew Dizeyî ketin.
Di vê êrişa Îranê de Pêşrew Dizeyî, Kerem Mixayîlê ku karsazekî Îraqî yê Xirîstiyan e û dema êrişê mêvanê Pêşrew Dizeyî bûye û keça Pêşrew Dizeyî ya bi navê Jîne canê xwe ji dest da.
Jîneya ku di êrişa Îranê de hat kuştin 25ê vê mehê dê bibûya yek salî.
Li aliyê din, dronek li Pîrmamê û yek ji Behirkeyê hatin xistin.
Berpirsê Operasyonên Taybet ê Ajansa Parastin û Zanyariyan Ebdula Hemereşîd ji Tora Medyayî ya Rûdawê re da zanîn ku wan bi rêya sîstema parastina asmanî du mûşekên Îranê xistine xwarê.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse