RÛDAW TAYBET - Heleb di nav wêranî û koçberiyê de ye

Heleb (Rûdaw) – Rûdaw dîmenên taxa Şear a Helebê tomar, dike ku niha di destê hikûmeta Sûrî de ye.

Xelkê Helebê, piştî agirên şer û pevçûnan, sermaya zivistanê, xemgînî, bêzarî û dilên şikestî li van kolana digerin. Tenê wêranî bersiva pirsên çavan derbarê êş û azarên giran didin. Rûdaw jî van dîmenan vediguhêze.

Xelk ji neçarî bi her aliyî ve tevgerê dikin. Xwe bi kelûpel û paqijkirinê mijûl dikin, weke hêviyekê ku hin tiştên jidestçûyî werin vegerandin.

Tevgereke bi tirs. Bêdengiyeke bi wate, ku dijwariya rewşê diyar dike. Wiha jî zehmetiya debara jiyanê ji cîhanê re eşkere dike.

Avahiyên, bêkes û xwedî ku ji xelkên xwe vala bûne, li cih mane. Hin mirov dema xwe bi karên cûrecûr derbas dikin. Beşek ji xelkê jî bi buxçik û barên hilgirtî xwe ji derketinê re amade dikin.

Maliştin û rêşkirina toz û axê ji ber deriyên avahiyên wêrankirî, nikarin bajarê 5 milyon nişteciyî ji nav kavilan rizgar bikin. Tenê ew çaverêyî derbaskirina demê ne.

Pirên wêrankirî jî çîroka tevgera hezarên mirov û otomobîlan vedibêjin, ku li vê derê jiyan hebû, lê niha bêhtir dengê kuştin, hejarî û xemgîniyê tê bihîstin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger