Hewlêr (Rûdaw) – Serokê Herêma Kurdistanê Nêçîrvan Barzanî û Serokwezîr Mesrûr Barzanî ji bo 60 saliya damezrandina Yekîtiya Mamosteyên Kurdistanê peyam belav kirin û pîrozbahî li mamostayên Kurdistanê kirin. Nêçîrvan Barzanî diyar kir ku mamoste jiyaneke çêtir heq dikin.
Nêçîrvan Barzanî di peyama ku di hesaba xwe ya Twitterê de belav kir û got, “Em girîngiyê didin rola mamosteyan a girîng û pîroz di perwerdekirin û mezinkirina nifşên niha û yên pêşeroja Kurdistanê de.” Her wiha di beşeke peyama xwe de bal kişand ser wê yekê ku mamoste kilîla serkeftina civakan in û ew jiyaneke çêtir heq dikin.
Serokwezîr Mesrûr Barzanî jî di peyama xwe de pîrozbahî li serok û endamên Yekîtiya Mamostayên Kurdistanê kir.
Mesrûr Barzanî diyar kir ku mamosteyan di parastina mafên gelê Kurd de roleke pêşeng lîstine û mamosteyên Kurdistanî di prosesên cuda yên tekoşîna gelê Kurdistanê de û di berevanîkirina mafên rewa yên gelê Kurdistanê de, mezinkirina nifşên nû û pêşxistina hişyariya civakî de roleke sereke lîstine.
Mesrûr Barzanî bal kişand li ser wê yekê ku mamoste dikarin bi perwerdeyeke rast û pêşketî civakeke tendurist û niştimanperwer ava bikin.
Mesrûr Barzanî her wiha spasiya mamosteyên Kurdistanê kir ku di rojên herî dijwar de hemû hewlên xwe dane bo berdewamiya xebatên xwe.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse