Hewlêr (Rûdaw) - Serokê Herêma Kurdistanê Nêçîrvan Barzanî ji ber serkeftina wê pîrozbahî li tîma Dihokê kir û got, "Em şanaziyê bi tîma Dihokê û serkeftina wê dikin."
Tîma futbolê ya Dihokê li hemberî tîma futbolê ya Qadisiyeyê ya Kuweytê 2-1 bi ser ket û bû şampiyonê Kluban a Kendavê.
Serokê Herêma Kurdistanê Nêçîrvan Barzanî ji ber şampiyoniya Dihoke peyameke pîrozbahiyê belav kir.
"Li Kurdistanê dilê me hemûyan şad kir"
Nêçîrvan Barzanî di peyama xwe de wiha got:
"Ji dil û bi germî pîrozbahyê li tîma Dihokê ya xoşewîst dikim ji bo serkeftna wê ya îro ku cara yekem bû şampiyona Kupaya Kendavê.
Wan bi vê serkeftinê û vê yariya ciwan û bihêz, li Kurdistan û seranserê Îraqê dilê me hemûyan şad kir. Em hemî şanazyê bi tîma Dihokê û vê serkeftinê dikin.
Yek bi yek destxweşiyê li hemû lîstikvan û berpirsên tîma Dihokê dikim ku cihê spasî û pêzanîn û şanaziya kurdistanê û hemî Îraqê ne.
Hêviya gelek serkeftin û bidestxistina gelek kupayên din ji bo wan dixwazim. Her bijîn, her hebin, her serkeftî bin."
Serkeftina dîrokî ya Dihokê
Hefteya borî Dihokê û Qadisiye di gava yekem fînalê ya Lîga Şampiyonan a Kluban a Kendavê de li Kuweytê hatibûn hemberî hev û maç 0-0 bi dawî bûbû.
Dihok û Qadisiye îro di gava duyem a fînalê de li stadyuma Dihokê hatin pêşberî hev.
Dihokê bi golên Siyabend Egîd (xuleka 66an) û Marlon Dos Santos (xuleka 90+2yan) 2-1 tîma Qadisiyeyê ya Kuweytê têk bir û bû şampiyon.
Cara yekem e ku tîmeke Îraq û Herêma Kurdistanê vê kupayê distîne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse