Pentagon: Operasyonên hevbeş ên bi HSDê re hatin destpêkirin
Hewlêr (Rûdaw) – Wezareta Berevaniya Amerîkayê ragihand, wan operasyon û gerên leşkerî yên hevbeş ên bi Hêzên Sûriyeya Demokratîk (HSD) re ji nû ve dest pê kirine. Piştî êrîşên wê dawiyê yên Tirkiyê bo ser Rojavayê Kurdistanê, gerên hevbeş ên di navbera hêzên Hevpeymaniya Navdewletî bi serkêşiya Amerîkayê û HSDê de hatibûn rawestandin.
Berdevkê Wezareta Berevaniya Amerîkayê Patrick Ryder ragihand, artêşa Amerîkayê ku piştî êrîşa hewayî ya Tirkiyê ya li dijî Rojavayê Kurdistanê û hin herêmên Sûriyê, gerên xwe yên leşkerî kêm kirin, careke din bi Hêzên Sûriyeya Demokratîk re dest bi gerên hevbeş ên leşkerî kir.
Patrick Ryder di civîna rojnamevanî ya rojane de got, “Li ser navê Amerîkayê ez dikarim bibêjim ku operasyonên me yên hevpar ên bi Hêzên Sûriyeya Demokratîk re ji nû ve dest pê kirin. Di 9ê Kanûnê de, bi tevahî dest pê kir. Careke din dibêjim, dîsa bala me ya ku bi hevkarên xwe yên li wir re dixebitin, li ser nevegerandina DAIŞê ye.”
Weke ku tê gotin 900 leşkerên Amerîkayê li Rojavayê Kurdistanê û navçeyên di bin kontrola HSDê de hene.
Amerîka di çarçoveya şerê dijî DAIŞê de HSD weke hevpeymaneke xwe ya sereke li ser axa Sûriyê dibîne û ji dema destpêkirin û berfirehtirbûna hevkariyên wan, Waşington salane di bûdceya xwe ya berevaniyê de budceyeke taybet bo HSDê vediteqîne.
Hêzên Amerîkî yên li navçeyên Rêveberiya Xweser bi hêzên HSDê re operasyon û gerên leşkerî yên hevbeş pêk tînin.
Roja 13ê Mijdarê teqînek li kolana Istiklal a Stenbolê çêbibû û di encam de 6 kes hatibûn kuştin. Tirkiyê bi fermî Yekîneyên Parastina Gel (YPG) ku beşa sereke ya HSDê de ye, bi encamdana teqînê tohmetbar kir, lê hem YPG, hem HSD û hem Rêveberiya Xweser û saziyên wê teqîna li Stenbolê şermezar kirin û îdiaya Tirkiyê red kirin.
Her li ser esasê wan tohmetbarkirinan, Tirkiyê di 20ê Mijdarê de operasyonek bi navê Pence Şûr bo ser Rojavayê Kurdistanê û navçeyên sînorî yên Herêma Kurdistanê da destpêkirin.
Ji ber bandora wan êrîşan, Fermandarê Giştî yê HSDê General Mazlûm Kobanî çend caran ragihand ku ew neçar in gerên xwe yên hevbeş ên bi hêzên Hevpeymanan re rawestînin daku bikarin li hember êrîşên Tirkiyê xwe biparêzin.