Hewlêr (Rûdaw) - Li parêzgehên Colemêrg, Mêrdîn û Sêrtê yên Bakurê Kurdistanê, hemû corên wek meş, civîn û xwepêşandan bo dema 15 rojan hatin qedexekirin.
Parêzgariya Colemêrgê ragihand ji 13ê Sibatê demjimêr 00:01 heta 27ê Sibatê bo dema 15 rojan hemû corên wek xwepêşandan, meş, grevên birçîbûnê, vedana kon û standan û çalakiyên wiha qedexe ne.
Di daxuyaniyê de tê îdîakirin ku bi armanca prensîbên serekî yên komarê, yekparçeyiya dewlet û netewe, binpênekirina maf û azadiyên kesên din, asayîşa xelkê û anîna aramiyê, rêgirtin li tawan, parastina maf û azadiyên xelkê, rêgirîkirina bûyerên civakî biryara qedexekirina xwepêşandan û çalakiyan hatiye dayîn.
Li gor daxuyaniyê, biryara qedexekirinê wan çalakiyên fermî li xwe nagire ku ji aliyê parêzgar û qeymeqaman ve destûr bo wan tê dayîn. Qedexeya çalakiyan a li Colemêrg û navçeyên wê, ji sala 2016an û heta niha berdewam e.
Li parêzgeha Mêrdînê ya Bakurê Kurdistanê, hemû corên meş, civîn, çalakî û xwepêşandan bo dema 15 rojan hatin qedexekirin.
Li gor daxuyaniya parêzgariya Mêrdînê ji 13ê Sibata 2023ê demjimêr 00:01 heta 27ê Sibata 2023ê demjimêr 24:00 hemû çalakiyên wek xwepêşandan, meş, daxuyaniya rojnamevaniyê, civîn, greva birçîbûne, belavkirina belavokan û vedana konan hatine qedexekirin.
Parêzgariya Sêrtê jî ragihand, hemû corên meş, civîn, çalakî û xwepêşandan bo dema 15 rojan hatin qedexekirin.
Li Sêrtê hemû awayên meş, civîn, çalakî û xwepêşandan bi hinceta “ewlehiya giştî” 14ê Sibata 2023ê demjimêr 00:01 heta 28ê Sibata 2023ê demjimêr 23:59 bo dema 15 rojan hatin qedexekirin.
Qedexekirina çalakiyan ev çend sal in li bajarên Bakurê Kurdistanê bi hincetên emnî tên ragihandin û dema wan qedexeyan berdewam tê dirêjkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse