Mamosta ji bo zimanê zikmakî meşiyan

Dêrsîm (Rûdaw) - Mamostayên ser bi Sendîkaya Mamostayan (Egîtîm-Sen)ê ji bo zimanê zikmakî duh ders boykot kirin û xwepêşandanek li dar xistin. Mamostayan daxwaz kirin ku 'dersa neçarî ya dînî' jî bê rakirin.

Bi hezaran mamostayên endamên Egîtîm-Senê ji bo 'perwerdehiya zimanê zikmakî' û 'nehêştina dersa neçarî ya dînî' li Kolana Hunerê ya Dêrsimê li hev civiyan û heta Kolana Cûmhûriyetê meşiyan.

Li wir li ser navê mamostayan Serokê Egîtîm-Sena Dêrsîmê Hasan Olgun axivî û rexne li hikûmet û deshilata siyasî girt. Olgun, di vî warî de wiha pêde çû:

"Ji dayîngehan bigire heta zanîngehê, ji bo pergala perwerdeyê pîvanên gerdûnî tên binpêkirin. Deshilata siyasî dîn bikar tîne û pîvanên dînî dixe bingeha pergala perwerdeyê. Em bi zimanê zikmakî perwerdeya zanistî û demokratîk diparêzin; lê AKP her roj paşverûtiyê dide ber pozê me."

Olgun, nerazîtiya xwe li dijî 'dersa neçarî ya dînî' jî derbirî û got: "Digel ku Dadgeha Mafên Mirovan a Ewrûpayê (DMME) biryar girt ku 'divê dersa neçarî ya dînî bê rakirin' jî AKP li dijî vê biryarê radiweste. Me daxwaznameyên ku 'Em dersa dînî ya neçarî naxwazin, emê zarokên xwe neşînîn vê dersê' dabûn dezgeh û saziyên têkildar.” 

Piştî daxuyaniyê xwepêşander hêminane belav bûn.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger