Balafirên Tirkiyê çiyayê Metîna Bombebaran kirin
Hewlêr (Rûdaw) - Balafirên şer ên artêşa Tirkiyê, çiyayê Metîna li nav sînorê Başûrê Kurdistanê bombebaran kirin. Wezareta Berevaniya Tirkiyê jî dibêje, di encama bombebaranê de 2 gerîlayên PKKê hatine kuştin.
Wezareta Berevaniya Tirkiyê îro Sêşemî di daxuyaniyekê de ragihand, balafirên şer ên artêşa wî welatî di çarçoveya operasyona Pence de, binke û baregehên PKKê li çiyayê Metîna li nav sînorê Başûrê Kurdistanê bombebaran kirine.
Di daxuyaniyê de hatiye gotin, di encama bombebaranê de 2 gerîlayên PKKê hatine kuştin.
Pençe Harekâtı ile koordineli olarak Irak kuzeyindeki Metina bölgesine düzenlenen hava harekâtı ile 2 PKK’lı terörist daha etkisiz hale getirildi.#MSB #TSK
— T.C. Millî Savunma Bakanlığı (@tcsavunma) August 13, 2019
Derbarê vê êrîşa esmanî ya bo ser çiyayê Metîna de, PKKê hêj ti daxuyanî nedaye.
Çiyayê Metîna dikeve sînorê navçeya Amêdî ya ser bi parêzgeha Duhokê ve û gelek caran bi hinceta hebûna baregehên PKKê, balafirên şer ên Tirkiyê vê deverê bombebaran dikin.
Tirkiyê ji 27ê Gulana îsal ve li ser sînorê bi Başûrê Kurdistanê re operasyonek li dijî PKKê bi navê Operasyona Pence, di du qonaxan de daye destpêkirin ku heta niha berdewam e.