Li Elbistanê qurbaniyên ku nasnameya wan nediyar tên veşartin

Hewlêr (Rûdaw) – Li navçeya Elbistan a Mereş a Bakurê Kurdistanê ku navendeke erdhejê bû qurbanyên ku nasnameyên wan nediyar e têne veşartin ku yên hinekan wêneyek û yên hinekan jî ti tişt nemaye li dû wan.

Goristana bêkesan a li navçeya Elbistan a parêzgeha Mereşê ya Bakurê Kurdistanê hejmarek xwebexş hatine navçeyê û kar birêve dibin.

Piştî erdheja 6ê Sibatê kesên ku nasnameya wan nehatiye diyarkirin û kesûkarekî wan derneketiye li vê derê tên veşartin.

Mele Yusuf anî ziman, “Demeke diyar a rawestandina terman heye. Eger kesekî wan nehatibe, ji ber dibe ku hemû malbatê canê xwe ji dest dabin, wê demê em dibin malbata wan.”

Li navçeyê heta niha nêzîkî 500 gorên bêkesan hatine kolandin û li gor ku berpirsê olî dibêje rojane nêzîka 80 heta 90 kes tên veşartin.

Mele Yusuf got, “Kesên nasnameya wan nediyar hene ku piraniya wan koçber in. Mînak ji Sûriyê hatine û nasnameya wan nehatiye zelalkirin. Lê temenê wan û cihê ku jê hatine derxistin tên nivîsandin.”

Li parêzgeha Mereşê ku navenda erdhejê bû kar û xebatên rizgarkirinê berdewam e û her ku diçe hejmara kesên canê xwe ji dest dane jî zêde dibe.

Serokatiya Rêveberiya Karesat û Rewşên Bilez (AFAD) Çarşema borî ragihandibû ku di nav 24 demjimêran de nasnameya wan diyar nebe piştî wergirtina testa DNA, wêne û pencemorê dê bên veşartin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger