Hewlêr (Rûdaw) – Tora Medyayî ya Rûdawê 3 xelatên Stevieyê distîne û tîne Hewlêrê.
Merasîma pêşkêşkirina xelatan dê îşev li bajarê Stenbolê were lidarxistin.
Birêvebirê Dîjîtal Medyaya Rûdawê Birwa Kiyanî, belgefîlma (Salek ji Şer) û programeke hevbeş a Rûdawê ya bi Neteweyên Yekbûyî (NY) re xelat standin.
12 hezar dezgehên mezin ên navneteweyî bi kar û berhemên xwe berbijêrên xelatên Stevieyeyê bûn.
3 hezar û 600 pisporan berhemên ku ji bo xelatên Stevieyeyê hatibûn namzedkirin nirxandin.
Rûdawê 3 xelatên zêrîn û xelateke bronz a Stevieyeyê standin.
Rûdaw Dîjîtal
Ji wan her sê xelatên Rûdawê 2 jê zêrîn in û yek jê jî bronz e. Birêvebirê Dijîtal Medyaya Rûdawê Birwa Kiyanî xelata zêrîn standiye.
Birwa Kyanî kariye ku di warê serkeftîbûna medyaya civakî de bala komîteya xelatê bikişîne û xelata zêrîn bistîne.
Birwa Kiyanî li cihanê bûye yek birêvebirekî serkeftî yê di warê medyaya civakî de û xelata zêrîn a Stevieyê standiye.
Komîteyê li ser kar û xebata Birwa iyanî wiha dibêje:
“Nêrîna wî ya stratejîk û serkirdayetiya wî hêzeke bihêz daye Rûdawê di warê medyaya dijîtal a cihanê de.
Birêvebirê Rûdawê wisa kiriye ku postên Rûdawê ji 70-80 hezar kesî bigihên 500 heta 600 hezar kesî û Rûdaw li Facebookê 1 milyar temaşevanên wê hebin.”
Salek ji Şer
Belgefîlma (Salek ji Şer) ji aliyê nûçegihana Rûdawê Dilniya Rehman û Ehmed Umer ve li nava dilê şerê Ukrayna û Rûsyayê li sengerên şer hatiye girtin.
Belgefîlma Salek ji Şer xelata duyem a zêrîn a Stevieyê stand.
Berhema Rûdawê ji aliyê komîteya Stevieyeyê ve ew qas pûan standine ku ti saziya din li gorî sîstema pîvana Stevieyeyê ti berhem nikare bibe duyem û sêyem.
Komîteyê li ser belgefîlma Salek ji Şer a Dilniya Rehman û Ehmed Umer wiha got:
“Ev xebat bi eşq û hezkirinê hatiye kirin.
Em dizanin girtin û montajkirina wê belgefîlmê çi qasî zehmet bûye. Belgefîlmeke gelekî baş e û divê her kes wê bibîne.”
Belgefîlm ji aliyê Birwa Umar ve hatiye montajkirin.
Her wiha komîteyê bangî Dilniya Rehman û Ehmed Umer jî kiriye û ji wan re wiha dibêje:
“Ji kerema xwe xebata xwe ya hêja ya ku hûn dikin bidomînin belgefîlm dilsoziya rojnamegerî, profesyonelî, rîskgirtinê ji bo dîtina rastiyê û çîrokbêjiya xurt nîşan dide.”
Perwerdekirina rojnamegerên jin
Xelata sêyem jî ji bo projeya hevbeş a Rûdawê û NYyê bûye. Di wê projeyê de ji bo jinên rojnameger ên li Îraq û Herêma Kurdistanê û perwerde hatiye dayîn.
Komîteya Steveyê bernameya Rûdawê hêjayî wergirtina xelata navneteweyî dîtiye û li ser xelatê wiha gotiye:
“Pêngaveke mezin e, ji ber ku ew yekem hevkarî ye di navbera dezgeheke ragihandinê ya Rojhilata Navîn û Neteweyên Yekbûyî de.
Di demekê de ku gelek dezgehên ragihandinê li ser wekheviya zayendî materyalan çêdikin Rûdaw ji bo ji holê rakirina vê newekheviyê di nava kar de ye û bi hêzkirina civakê destnîşaniyê bi guhertineke mezin dide.”
Xelata Stevieyê di warê medyayê de xelateke gelekî girîng a navneteweyî ye û pir bi prestîj e.
Heta niha dezgehên wekî CNN, NBC, Bloomberg û Al Jazeerayê xelatên Stevieyê standine.
Birêveberê Newsgatheringa Tora Medyayî ya Rûdawê Bêstûn Nûrî li ser xelatan wiha got:
“Rûdaw bi berdewamî geş dibe û karê xwe baştir dike. Em dê gavên mezintir biavêjin da ku li seranserê cîhanê bi bandortir bibin û bi pêş bikevin.”
Rûdaw 3 xelatên din ên navneteweyî tîne Hewlêrê
— RudawKurdi (@RudawKurdi) October 11, 2024
Xelata Stevieyê çi ye û kî dikare bistîne? pic.twitter.com/2UPYfDirT5
