Kurdistan
Dengderek li binkeyekê li Kerkûkê ji bo hilbijartina parlamentoya Iraqê deng dide. Wêne: AFP
Hewlêr (Rûdaw) – Serokê Encûmena Serkirdatiya Partiya Demokrata Kurdistanê (PDK) li Kerkûk-Germiyanê ragihand, li sînorê Kerkûkê PDKê du kursiyên parlamentoya Iraqê misoger kirine.
Kemal Kerkûkî, Serokê Encûmena Serkirdatiya li Kerkûk-Germiyanê ji Rûdawê re ragihand, li gor encamên destpêkê, Şaxewan Ebdulla berbijêrê PDKê li Bazneya 1 a Kerkûkê, piraniya dengan bidest xistiye û Necwe Hemîd berbijêra PDKê li Bazneya 2 a Kerkûkê jî, pileya duyem a zêdetirîn rêjeya dengan bidest xistiye.
Di xûla sêyem a parlamentoya Iraqê de, PDK li Kerkûkê 2 kursî di parlamentoyê de hebûn lê belê di xûla çarem a parlamentoyê de ji ber bûyerên Cotmeha 2017an, PDKê proseya hilbijartinê li Kerkûkê boykot kir û ti kursiyên wê li vê parêzgehê nebûn.
Kemal Kerkûkî derbarê vê rewşê de got: “Ya di xiyaneta 16ê Cotmeha 2017an de qewimî, sepandina hêzê bû, lewra PDKê ev yek qebûl nekir.”
Li gor encamên destpêkê yên nefermî, li Bazneya 1 a Kerkûkê berbijêrê PDKê Şaxewan Ebdulla rêjeya herî zêde ya dengan bidest xistiye û Dîlan Xefûr jî li heman bazneyê, di pileya duyem de ye. Herwiha ji lîsteya Hevpeymaniya Kurdistan, ku ji YNK û Tevgera Goran pêk tê, Sidîq Omer û Mueyed Xazî biserketine.
Her li Bazneya 1 a Kerkûkê, kursiya çarem a Hevpeymaniya Kurdistanê di navbera berbijêrekî vê lîsteyê û berbijêrekî Ereb de hêj yekalî nebûye û ji bo diyarbûna berbijêrê serkevtî, li benda encamên dengdana taybet li vê bazneyê ne.
Li aliyekî din, li Bazneya 2 a Kerkûkê berbijêrekî YNKê û Tirkmen rikeberiyê li ser bidesxistina kursiya duyem a parêzgehê dikin. Li vê bazneyê, Erşed Salihî berbijêrê Cebheya Tirkmenî zêdetir ji 14 hezar deng anîne û di pileya yekem de ye.
Parêzgeha Kerkûkê ji 3 bazneyên hilbijartinê pêk hatiye, li tevahiya bazneyan 1 milyon û 11 hezar û 928 kesan mafên wan ê dengdanê hebû, herwiha 12 kursiyên Kerkûkê di parlamentoya Iraqê de ne, ku 3 ji wan kursiyan taybet bi kotaya jinan e.
Ev encamên tên ragihandin, encamên destpêkê û nefermî ne û dibe guhertin di encaman de çê bibe.
Komîsyona Bilind a Serbixwe ya Hilbijartinan a Iraqê êvara duh Yekşemî 10ê Cotmeha 2021an ragihand, di 24 demjimêrên bê de dê encamên destpêkê yên fermî yên hilbijartinan aşkere bike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse