Hewlêr (Rûdaw) - Serowkezîrê Herêma Kurdistanê Nêçîrvan Barzanî, îro duşemî 11ê Îlona 2017ê li bajarê Hewlêrê, pêşwazî li Konsulê Giştiyê dewleta Kuwêytê yê li Herêma Kurdistanê Omer Elkenderî û şandeka pê re kir û di civînekê de tekezî li ser xurtkirina têkeliyên navbera Hewlêr û Kuwêytê hat kirin.
Li gorî daxuyaniya Hikûmeta Herêma Kurdistanê, Konsulê Kuwêytê di vê civînê de behsa têkeliyên du alî, hevkariyên mirovî yên dewleta Kuwêytê bo koçber û penaberên destê terorê yên li kampên Herêma Kurdistanê ku bi rêya rêxistinên mirovî dabîn dike, kir û tekezî li ser berdewamiya wan hevkarî û alîkariyan kir.
Omer Elkenderî spasiya sazî û rêxistinên xêrxwaziyên Herêma Kurdistanê kir, ku hevahengî û hevkariyeke baş dikin, daku ew alîkarî bi awayekî rast û dirust bigihîjin kampên koçber û penaberan.
Serokwezîrê Herêma Kurdistanê Nêçîrvan Barzanî spasiya dewlet û Emîrê Kuwêytê kir ji bo wan alîkarî û hevkariyên gihandine koçber û penaberên li Herêma Kurdistanê û got, ku wan alîkariyan piçke ji barê giranê li ser hikûmeta Herêma Kurdistanê siv kir.
Nêçîrvan Barzanî got, ku Herêma Kurdistanê dixwaze baştirîn pêwendî ligel dewleta Kuwêytê hebe û Herêma Kurdistanê dê bi germî pêşwaziyê li sermayedar û kompaniyên Kuwêytê bike, ku bihên li Herêma Kurdistanê di warên cuda de sermayeyên xwe birazînin.
Rewşa Navxweyî ya Herêma Kurdistanê, pirsa referendum û paşeroja têkeliyên navbera Hewlêr û Bexdayê jî di civînê de hatin gotûbêjkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse