Bafil Talebanî li ser peymana Mezlûm Ebdî û Ehmed Şer daxuyanî da

Hewlêr (Rûdaw) - Serokê Yekîtiya Nîştimanî ya Kurdistanê (YNK) Bafil Talebanî peymana ku di navbera Mezlûm Ebdî û Ehmed Şer hatiye îmzekirin de  wekî gaveke erênî nirxand.

Fermandarê Giştî yê Hêzên Sûriyeya Demokratîk (HSD) Mezlûm Ebdî û Serokkomarê Demkî yê Sûriyeyê Ehmed Şer şeva borî peymanek îmze kir.

Serokê Giştî yê YNKyê Bafil Talebanî derbarê wê peymanê daxuyaniyek da û diyar kir ku ew gaveke girîng e.

Bafil Talebanî  amaje bi wê yekê kir ku peymana 8 xalî ya di navbera Mazlûm Ebdî û Ehmed Şare de dê mafên xelkê Rojavayê Kurdistanê biparêze û wê yekê hêviyan wan zêde kiriye.

“Gaveke girîng û erênî ye”

Daxuyaniya Bafil Talebanî wiha ye:

“Rêkeftina birêz Mezlûm Ebdî û Ehmed Şer bi germî pêşwazî dikim.

Ev yek ji bo xurtkirina jiyan û xebata hevpar a li Sûriyeya nû gaveke girîng û erênî ye.

Ev yek rêya herî rast e ku aramiya siyasî û ewlehiyê bi xwe re tîne û me ji destpêkê daxwaza wê kir û em ji bo wê xebitîn.

Ev gav ku mafê gelê me li Rojava û hemû pêkhateyan diparêze, em hêvî dikin bibe destpêka nû ji bo avakirina welatekî demokratîk û li ser daxwaziya gel ku destûr bingeha xebat û hevpariyê be.

Wekî her tim em dê piştevanê birayê birêz Mezlûm Ebdî ji bo bicihkirina aştî û aramiyê li herêmê bin.”

Xalên peymana Ebdî û Şer ev in:

1- Garantîkirina mafê hemû Sûriyeyiyan di nûnertî û beşdariyê di pêvajoya siyasî de û di hemû saziyên dewletê de li gorî pisportiyê bêyî ku girêdana wan a olî û etnîkî di ber çavan re were derbaskirin.

2- Civaka Kurdan di dewleta Sûriyeyê de civakeke resen e û dewleta Sûriyeyê mafê wan ê hevwelatîbûn û hemû mafên wan ên destûrî misoger dike.

3- Agirbesta li seranserê axa Sûriyeyê.

4- Tevlîkirina hemû saziyên sivîl û leşkerî yên li bakurrojhilatê Sûriyeyê di çarçoveya birêveberiya dewleta Sûriyeyê de, di nav de deriyên sînorî, firokexane, zeviyên petrol û gazê.

5- Garantîkirina vegera hemû koçberên Sûriyeyî ku biçin gund û bajarên xwe û parastina wan ji aliyê dewletê ve.

6- Piştgiriya dewleta Sûriyeyê di rûbirûbûna bermayiyên Esed û hemû wan gefên ku ewlehî û yekparçeyiya axa wê tehdît dikin.

7- Redkirina daxwazên parçekirin û helwestên kîndarî û hewldanên derxistina tevliheviyan di navbera pêkhateyên civaka Sûriyeyê de.

8- Komîteyên birêvebirinê dê kar ikin û hewl didin ku peyman were bicihkirin bi rengekî ku heta dawiya vê salê derbas neke.”