Hewlêr (Rûdaw) - Tora Medyayî ya Rûdawê pir dilgiran e ji reftara xirab a karmendê rêxistina UNESCOyê ya di dema serdana Rêvebera Giştî ya UNESCO Audrey Azoulay ji bo bajarê Mûsilê li hember peyamnêra torê Peyam Serbest û kameramanê wê. Ev bûyer di 7ê Adara 2023an de, rojekê berî Roja Cîhanî ya Jinan li Mûsilê qewimî.
Rojnamevana Tora Medyayî ya Rûdawê ji aliyê karmendê UNESCOyê û karmendên ewlehiyê ve bi zorê hat derxistin, tenê ji ber ku wê di civîna çapemeniyê de pirsek ji Rêvebera Giştî ya UNESCOyê kiribû. Ev kar binpêkirineke eşkere ya mafên rojnamevanî û azadiya derbirînê ye. Rûdaw wek saziyeke nûçeyan li navçeyekê kar dike ku azadiya çapemeniyê û mafên mirovan gelek caran dikevin bin gefê de. Lewra em di wê baweriyê de ne ku ev karê UNESCOyê bi tevahî berovajî wan nirxan e ku divê ew rêxistin wan biparêze.
Tora Medyayî ya Rûdawê daxwaz dike ku rêxistina UNESCO bi awayekî fermî daxwaza lêborînê bike û li ser wê reftara ku li hember peyamnêra me hat kirin daxuyaniyê bide. Em daxwazê ji rêxistina UNESCOyê dikin ku pêngavên cidî û bilez bavêje ji bo piştrastbûna ji dubarenebûna bûyerên bi vî rengî, her wiha ji bo nîşandana niyetpakiya rêxistinê ya bilindragirtina nirxên azadiya rojnamevanî û azadiya derbirînê û mafên mirovan.
Baweriya me ya tam heye ku divê rêxistinên navdewletî yên wek UNESCOyê nimûneyî bin û berevaniyê li mafên rojnamevanan bikin ji bo ku bikaribin karên xwe bê tirs û dirustkirina astengiyan pêk bînin. Ev reftara karmendê UNESCOyê li hember peyamnêra me, bi temamî binpêkirina van prensîban e.
Tora Medyayî ya Rûdawê
11ê Adara 2023an
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse