Hewlêr (Rûdaw) – Wezareta Navxweyî ya Iraqê desteserkirina grûba ku 3 endamên malbateke Xirîstiyan ser jê kiribûn ragihand.
Berdevkê Wezareta Navxweyî yê Iraqê Se'd Mein bi daxuyaniyekê ragihand ku hêzên ewlehiyê duh (20-03-2018) wê grûba ku şeva pêncşemê li Bexdayê malbateke Xirîstiyan kuştibûn desteser kir.
Se'd Mein diyar dike ku derbarê endamên wê grûbê de lêpirsîn hatiye destpêkirin û hemû rêkarên yasayî dê li dijî wan werin bikaranîn.
Şeva pêncşemê pizîşkekî Xirîstiyan, hevjîn û dayîka wî, li mala xwe ya li devera Meştel a Bexdayê, ji aliyê çend kesan ve bi kêrê hatibûn serjêkirin û kujeran zêr û pereyên wan revandibûn.
Berî niha jî bûyerên êrişkirina ser welatiyên Xirîstiyan li Bexdayê û deverên din ên jêra Iraqê, bûbû sedema reva Xirîstiyanan û hejmareke mezin berê xwe dabûn Herêma Kurdistanê.
Serokê Komeleya Iraqî ya Mafên Mirovan a li Amerîkayê Hemîd Murad eşkere dike ku ji sala 2003an ve heta niha ji deverên cuda yên Iraqê zêdetirî hezar û 220 Xirîstiyan hatine kuştin û dibêje: “Êş û jana mezin piştî hatina DAIŞê dest pê dike, %81ê Xirîstiyanan aware bûn.”
Hemîd Murad diyar dike ku di sala 2000ê de hejmara Xirîstiyanan 850 hezar kes bûn li Iraqê, lê niha hejmara wan heta 200 hezaran kêm bûye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse