Hewlêr (Rûdaw) - Li parêzgehên Wan û Bedlîsê yên Bakurê Kurdistanê rêyên 124 gund û mezrayan ji ber berfê hatin girtin.
Berfa ku ji şeva borî ve li Wanê dibare li gund û navçeyên di çûn û hatinê de dibe sedema astengiyan û rê ji ber berf û pûkê tên girtin.
Şaredariya Bajarê Mezin a Wanê îro ragihand ku ji ber bandorên xirab ên keşûhewayê li parêzgehê rêyên 86 gund, mezra û taxan hatine girtin.
Şaredariya da zanîn ku tîmên pêwendidar jib o vekirina wan rêyan dest bi xebatan kirine.
Berpirsê Rêvebiriya Xizmetên Vegihastin û Rêyan a Îdareya Taybet a Bedlîsê Umit Kurtkan jî ragihand li parêzgehê rêyên 38 gundan hatine girtin.
Bi gotina Umit Kurtkan tîm hewil didin wan rêyan careke din ji bo çûn û hatinê re vekin.
Bandorên neyînî yên keşûhewayê li Colemêrgê jî astegiyan di çûn û hatinê de çêdikin.
Li ser rêya Şemzînan-Geverê ji ber berf, pûk û mijê barhilgireke ku barê wê konteynir bû ji rê derket û dorseya wê di rê de ma.
Ji ber wê jî astengî di çûn û hatinê de çêbûn.
Saziya Keşnasiya Tirkiyeyê ragihandibû ku dê li parêzgehên Wan, Erzirom, Agirî, Mûş, Sêrt, Bêdlîs, Colemêrg û Şirnexê yên Bakurê Kurdistanê berf bibare.
Heman saziyê herwiha bangî welatiyan kiribû ku derbarê bandorên neyînî yên keşûhewayê tedbîrên pêwîst wergirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse