Hewlêr (Rûdaw) - Li parêzgeha Wanê ya Bakurê Kurdistanê bi pêşengiya Komeleya Pêşvebirina Çand û Ziman (KURDÎGEH) belavok hatin belavkirin û daxwaza perwerdeya bi zimanê Kurdî hat kirin.
Li navenda Wanê bi beşdarbûna parlamenterên DEM Partiyê Mahmut Dîndar û Zulkuf Uçar xwenîşandan hat kirin.
Girseyê xwenîşandanê heta Kolana Cumhurriyetê meşiya û ji bo balê bikişînin ser girîngiya perwerdeya bi zimanê dayîkê belavok belav kirin.
Rêxistina DEM Partiyê ya Wanê li ser hesabê xwe yê Xê derbarê çalakiyê peyam û dîmen belav kirin.
“Perwerdeya bi Kurdî mafê gelê Kurd ê”
Rêxistina DEM Partiyê ya Wanê di peyama xwe de got:
“Perwerdeya bi Kurdî mafê gelê Kurd ê herî pîroz e.
Em îro bi pêşengiya KURDÎGEHê beşdarî çalakiya ji bo perwerdeya bi Kurdî bûn.
Em dê li her derê zimanê xwe biparêzin.”
Xwenîşandan û çalakiyên derbarê statu û perwerdeya bi zimanê Kurdî li seranserê Bakurê Kurdistanê didomin.
"#Kurdî hebûn, xwebûn, rûmet û nasnameya Kurdan a neteweyî ye!"
— DEM PARTİ WAN (@DEMPartiWan) September 9, 2025
Me îro bi pêşengiya @KurdiGehWan ê ve belavoka zimanê Kurdî li kolanên Wanê belav kir!
Em ê ji bo mafê ziman li her derê bikene dibistan! pic.twitter.com/DN4p4ovOW4
