Hewlêr (Rûdaw) - Saziya Keşnasiyê ya Tirkiyeyê ragihand ku îro li parêzgehên Colemêrg, Şirnex, Amed, Sêrt û Êlihê yên Bakurê Kurdistanê baraneke gur dibare.
Li cîhan û Kurdistanê cejna Remezanê tê pîrozkirin û li bilindahiyên Wanê û navçeya wê Elbakê jî berf dibare.
Saziya Keşnasiyê ya Tirkiyeyê ji bo çend bajarên Bakurê Kurdistanê, ji ber barana zêde hişyariya lehî, brûsk, zîpik, bahoz û qelebalixiya trafîkê da.
Herwiha ji bo herêmên bilind jî hişyariya aşût û hezazê hat dayîn û ji xelkê hat xwestin tedbîrên pêwîst wergirin.
Li bajarên Colemêrg, Şirnex, Amed, Sêrt û Êlihê baraneke gur dibare.
Li Wanê berf bariya
Li deverên bilind ên Wanê berf û li navenda bajêr jî baran bariya.
Li ser rêya Wan û Colemêrgê bi şevê berf bariya û şofêran tengasî kişand.
Li navendê jî ji ber barana gur li hin taxan lehî rabû, avê da binê hinek xaniyan.
Tîmên Şaredariya Bajarê Mezin a Wanê li ser agahdarkirinê çûn hewara herêmên ku lehî li wan rabûye.
Li navçeya Elbakê jî duh baraneke gur bariya û sibehê jî veguherî berfê.
Navçe di binê berfê de spî bû û welatî wextê ku ji bo nimêja cejnê û ziyareta goristanê ji malên xwe derketin, rastî berfê hatin.
Li hêla din, li hinek parêzgehên Bakurê Kurdistanê dê îro pileya germê bi vî awayî be:
- Erzirom: 13°C
- Qers: 12°C
- Meletî: 18°C
- Wan: 14°C
- Amed: 17°C
- Dîlok: 19°C
- Sêrt: 17°C
- Riha: 22°C
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse