Hewlêr (Rûdaw) - Li deverên bilind ên Wanê berf bariya û li hinek taxên bajêr jî ji ber barana zêde lehî rabû.
Herwiha rêya bejahiyê ya Wanê ji ber hezazê li 3 cihan hat girtin.
Li bajêr şiliya ku ji duh ve bê navber dibare bandoreke neyînî li jiyanê xelkê kir.
Li ser rêya Wan-Colemêrgê ji ber berfa ku bi şev bariya şofêran zehmetî kişand.
Ji ber barana zêde li hin taxan lehî rabû û avê da bin xaniyan.
Tîmên îtfaiyeyê yên Şaredariya Bajarê Mezin a Wanê, midaxeleyî taxên ku lehî rabû kir.
Li navçeya Elbakê ya Wanê piştî barana bihêz a duh, îro sibehê jî berfê dest pê kir.
Welatiyên ku sibehê zû hişyar bûn, di bin berf û baranê de çûn serdana goristanê.
Rêya Colemêrg-Wanê hat girtin
Li aliyê din rêya Colemêrg-Wanê ji ber hezazê li sê deverên cuda hat girtin.
Tîmên pêwendîdar dest bi vekirina rê kiriye.
Ji ber baranê li ser rêyan av kom bû û li hin cihan jî ji ber ava ku ji jor de diherikî ax û kevir kom bûn.
Li devera Depînê ya li ser rêya Colemêrg-Wanê, di tunela nêzîkî gundê Dêzê de hezaz çêbû.
Li ser vê yekê ekîbên Rêbejê û Îdareya Taybet a Parêzgehê çûn cihê hezazê û wan ji bo vekirina rê dest bi xebatê kir.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse