Hewlêr (Rûdaw) - Şandeyeke Rûsya û Sûriyeyê li bajarê Qamişloyê yê Rojavayê Kurdistanê bi Hêzên Sûriyeya Demokratîk (HSD) re civiya.
Şer û pevçûnên di navbera HSD û grûpên çekdar ên girêdayî Hikûmeta Sûriyeyê de ku roja Çarşemê li Dêrezorê dest pê kiribûn, berdewam dikin.
Grûpên çekdar ên girêdayî Hikûmeta Sûriyeyê ku Îran û Hizbulaha Libnanî jî piştgiriya wan dike, gef dixwin ku herêmên li rojhilatê Çemê Feratê yên di bin kontrola HSDyê de ne bi dest bixin.
HSDyê ragihand ku li gundên Cidêde Bagara û Dehleyê di topbaranên komên çekdar ên Hikûmeta Sûriyeyê de heta niha 11 sivîl şehîd ketine 5 sivîl jî birîndar bûne.
Sekreterê Hevpeymana Sûriyeyê ya Niştimanî Aram Domanî beşdarî bultena Rûdawê bû û li ser mijarê bersiva pirsên Sureya Hesariyê da.
Aram Domanî da zanîn ku her ku li ser zêdebûna aloziya, şandeyeke ji rayedarên Rûs û Sûriyeyê li Balafirgeha Qamişloyê bi rayedarên HSDyê re li ser çareseriyê hevdîtinek pêk aniye.
Aram Domanî diyar kir ku ti encameke erênî ji hevdîtina şandeya Rûsya û Sûriyeyê ya bi HSDyê re derneketiye.
