Hewlêr (Rûdaw) - Serokatiya Herêma Kurdistanê derbarê êrîşa terorîstî ya şeva borî ya Hewlêrê daxuyaniyek belav kir.
Di daxuyaniyê de hat gotin, "Em bi tundî êrîşa terorîstî ya şeva Çarşemê 8-9ê Hezîrana 2022an li ser Hewlêra paytexta Herêma Kurdistana şermezar dikin ku di encamê de çend welatiyên sivîl birîndar bûn û gelek otomobîlan jî ziyan dîtin."
Serokatiya Herêma Kurdistanê ragihand, “Em di wê baweriyê de ne ku dubarekirina van kiryarên terorîstî dê zirarê bide aramiya emnî û rewşa siyasî ya Iraqê bi giştî û navçeyê û xizmeta dijminên Herêma Kurdistanê û Iraqê bike.”
Di peyamê de hat gotin, "Weke her car [Serokatiya Herêma Kurdistanê] piştevaniya bihêzkirina hemahengî û hevkariya di navbera dezgehên ewlekarî yên Hikûmeta Herêma Kurdistanê û Hikûmeta Federal a Iraqê de dike ji bo dîtina kesên ku destê wan di van êrîşan de hene."
Hikûmeta Herêma Kurdistanê daxwaz ji aliyên pêwendîdar ên Iraq û civaka navdewletî kir ku gavên cidî bavêjin ji bo rêgirtin li dûbarebûna wan êrîşan ku bandoreke mezin li ser aramiya navçeyê bi giştî dike.
Şeva bihurî li ser rêya Pîrmam-Hewlêrê droneke bombebarkirî teqiya û 3 kes birîndar bûn, hejmarek otomobîlan jî ziyan dîtin.
Encumena Asayişa Herêma Kurdistanê ragihand, ew kesên ku îddîa dikin ku otomobîleke rêxistina îstixbarata Îsraîlê MOSSADê hatiye armanckirin, dixwazin têkçûn û lawaziya xwe veşêrin, ew bila her tiştî ewlehiya di nav cergê paytext û bajarên xwe de biparêzin.
Bi vê êrîşa şeva borî, di sal û nîvekê de 12 êrîş li Hewlêr û derdora wê hatine kirin. Herî dawî di 11ê Îlona 2021an de bêyî ku ti ziyanên canî çêbibin êrîşa bi dronan li ser Hewlêrê pêk hatibû.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse