Hewlêr (Rûdaw) - Li gundekî navçeya Hesenkelehê yê parêzgeha Erziromê ya Bakurê Kurdistanê banê xanî bi ser malbatekê de ket û di encamê de 2 zarok mirin.
Li gundê Porsukê yê navçeya Hesenkelehê, şeva borî demjimêr 21:00ê banê xaniyê ku bi axê hatibû çêkirin bi ser malbateke 6 kesî de ket xwarê.
Di bûyerê de 6 kes di bin banê hilweşiyayî de man ku wan debara xwe bi şivantiyê dikir.
Li ser agahdarkirinê, tîmên tendursitiyê û tîmên parastina sivîlan û cendirme çûn cihê bûyerê.
Hinek ji kesên di bin banê kavilbûyî de mabûn bi derfetên xwe derketin û hinek jî ji aliyê tîman ve hatin rizgarkirin.
Tîmên tenduristiyê birîndar bi ambulansan veguhastin nexweşxaneyên bajêr.
Kerîmhan û Sudenaz mirin
Lê ji birîndaran xwîşk û birayên hev Kerîmhan Kara (6) û Sudenaz Kara (11) tevî hemû midaxeleyan mirin.
Tê gotin ku derbarê bûyerê dest bi lêpirsînê hatiye kirin û dê li nav malê jî lêkolînên teknîkî bên kirin ka sedema herifîna banê xanî çi bûye.