Hewlêr (Rûdaw) – Çekdarên Hikûmeta Sûriyeyê li Dêrezorê êrişî mizgeft û sivîlan kiriye.
Çekdarên Hikûmeta Sûriyeyê ji şeva çarşemê heta sibeha pêncşemê êrişî çend deverên cuda yên Dêrezorê kir ku cihek ji wan jî gundê el-Dihleyê bû.
Şervanên Hêzên Sûriyeya Demokratîk (HSD) bersiv da êrişan û çekdar neçar man vekişin.
Cihek ji cihên ku komên çekdar êrişî kiribû jî gundê el-Sebheyê yê Dêrezorê bû.
Piştî ku şervanan êrişkar ji gund derxistin şop û dewsên êrişên wan derketin holê.
Li el-Sebheyê dewsên topan li ser dîwarên malan diyar in.
“Çend top li otomobîl û xaniyê min ketin”
Şêniyekî gundê el-Sebheyê diyar kir çekdaran êrişî malên sivîlan kiriye û got:
"Gundê el-Sebheyê ji aliyê hêzên rejîma Sûriyeyê û milîsên Îranê ve bi topên hewan û rokêtan hat hedefgirtin.
Çend mal bûn hedef ku mala min jî di nav wan de ye. Çend top li otomobîl û xaniyê min ketin."
“Mizgeft bi rokêtan hat armancgirtin”
Melayê mizgefta gundê el-Sebheyê ji diyar kir ku berbangê mizgeft hatiye topbarankirin û li pey çû:
"Ez melayê gundê el-Sebheyê me. Mizgeft ji aliyê milîsên Îranê û alîkarên wan ve bi rokêtan hat armancgirtin .
Demjimêr çar û nîvê sibehê dema min mizgeft paqij dikir, wan êrişî mizgeftê kir.”
Li bajarokê Zîbanê yê Derezorê jî hem zerera madî û hem a canî hebû.
“Birayê min hat kuştin û kurê wî birîndar bû”
Şêniyekî bajarokê Zîbanê anî zimên ku milîsên Îranê êrişî wan kiriye û pê de çû:
“Em bi top û rokêtên milîsên Îranê hatin armancgirtin.
Birayê min hat kuştin û kurê wî birîndar bû û xwîşka min ji lingê xwe birîndar bûye, dibe ku lingê wê were jêkirin û birayê min ê din jî birîndar e."
Di vîdeoyeke ku hatiye belavkirin de fermandarekî grûpên êrişkar fermanê dide çekdarekî ku sivîlan bike hedef.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse