Hewlêr (Rûdaw) - Grûpeke çekdar welatiyekî Kurd li herêma Efrînê ya Rojavayê Kurdistanê revandine, bi tundî îşkence kirine û ew şelandine.
Rêxistina Mafên Mirov li Efrînê ragihand ku 7 çekdarên bi cilûbergên Artêşa Niştimanî ya opozisyona Sûriyê welatiyê Kurd Mihemed Axreş yê 40 salî, revandine û pereyên wî jê standine.
Roja çarşemê, 5 vê mehê çekdaran ew kesê Kurd li nêzîk gundê Baflorê girtine û birine nav zeviyekî zeytûnan û li wir bi tundî lê xistine û 3000 dolar û 2000 lîreyên Tirkî jê standine.
Ew kes xelkê gundê Sinarê ye û bazirganê zeytê ye.
Artêşa Tirkiyê û grûpên çekdarên ên tundrew ku ser bi opozisyona Sûriyê ve ne û Tirkiye piştevaniya wan dike, roja 20ê Çileya 2018an êrişeke berfireh a bejayî û asmanî bo ser Efrînê dan destpêkirin ku di bin kontrola hêzên Kurdî de bû.
Piştî wê êrişa berfireh a bi her cor çekên giran, bajarê Efrînê roja 18ê Adara 2018an ket destê artêşa Tirkiyê û grûpên çekdar.
Di encama êrişên giran û ketina bajêr bo destê çekdaran de, bi sed hezaran xelkê Kurdan mal û warên bicî hiştin û ketin ser rêyên koçberiyê.
Herwiha ji wê roja ku Efrîn ket bin kontrola artêşa Tirkiyê û komên çekdar ên opozisyona Sûriyê, binpêkariyên li hember welatiyên Kurd li wê herêmê berdewam in.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse