Hewlêr (Rûdaw) - Serokayetiya Rêveberiya Karesat û Rewşên Bilez (AFAD) ragihand ku termên qurbaniyên erdhejê ku nasnameya wan nahatine destnîşankirin dê piştî 24 demjimêran bi axê bên spartin.
Serokayetiya Rêveberiya Karesat û Rewşên Bilez (AFAD) roja Çarşemê 8ê Sibata 2023an di daxuyaniyekê de ragihand ku termên qurbaniyên ku di erdheja Bakurê Kurdistanê û Tirkiyê de canê xwe ji dest dane û nasnameya wan nehatine destnîşan kirin piştî rawestandina 24 demijimêran dê bi axê bên spartin.
Saziya navborî herwiha diyar kiriye ku dê bo kesên canê xwe ji dest dane û nasnemeya wan nehatine destnîşankirin, pişkînînên DNA bên kirin, pencemor û wêneyên wan bên wergirtin û piştre bi axê bên spartin.
Berbanga roja Duşemê 6ê Sibata 2023ê erdhejeke bihêz parêzgeha Mereşê ya Bakurê Kurdistanê hejand û bû sedema zerar û ziyanên zêde yên canî.
Serokkomarê Tirkiyê roja Çarşemê 8î Sibata 2023an di daxuyaniyekê de ragihand ku 8 hezar û 574 kesan canê xwe ji dest dan û 49 hezar û 133 kes birîndar bûne û 6 hezar û 444 avahî jî hilweşiyane.
Li aliyekê karûxebatên derxistina qurbaniyên erdhejê berdewam in û li aliyekê din jî hewil tê dayîn ku termê kesên ku canê xwe ji dest dane bi axê bên spartin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse