Hewlêr (Rûdaw) - Serokwezîrê Herêma Kurdistanê pêşwaziya şandeke Almanyayê bi serokatiya Berpirsê Karûbarên Rojhilata Navîn ê Wezareta Derve ya Almanyayê kir. Di civînê de behsa pêşxistina peywendiyên di navbera Herêma Kurdistanê û Almanyayê de hate kirin.
Serokwezîrê Herêma Kurdistanê Mesrûr Barzanî îro Çarşemê 7ê Berfanbara 2022an pêşwaziya Berpirsê Karûbarên Rojhilata Navîn ê Wezareta Derve ya Almanyayê Tobias Tunkel û şanda pê re yê ku ji Balyozê Almanyayê yê Iraqê û Konsulê Giştî yê Almanyayê yê Herêma Kurdistanê pêk dihat kir.
Li gorî daxuyaniya Hikûmeta Herêma Kurdistanê, di civînê de rewşa giştî ya Iraqê û navçeyê û geşepêdanên peywendiyên di navbera Herêma Kurdistanê û Almanyayê de hat gotûbêjkirin.
Di beşeke din ya civînê de ku Balyozê Almanyayê yê Iraqê Martin Yeger û Konsulê Giştî yê Almanyayê li Herêma Kurdistanê Klaus Streicher amade bûn, behsa giringiya cîbicîkirina Rêkeftina Şingalê û vekişandina milîs û hêzên çekdar ên neyasayî hat kirin.




