Hewlêr (Rûdaw) - Cotkarên Kurd û Tirkmen ên parêzgeha Kerkûkê got, “Hinek alî hîn ji xewna xwe ya dagirkeriyê şiyar nebûne û dixwazin dest dayînin ser milkên me.”
Nûnerê cotkarên navçeya Topizawayê ya Kerkûkê Satih Nasih doh peyama hevbeş a cotkarên Kurd û Tirkmen ên Kerkûkê xwend û got:
“Nêzîkî 50 sal in em qurbaniyên yekem ên biryarên Encûmena Serkirdayetiya Şoreşê ya hilweşiyayî ne.
Em bangî parlamenterên Kurd û Tirkmen dikin ku bi rêya parlamentoyê ji bo hilweşandina van biryaran hewl bidin.”
Projeyasaya vegerandina mal û milkên li xwediyên wan biryar bû roja sêşemê li Parlamentoya Îraqê were xwendin.
Cotkarên Kurd û Tirkmen ên Kerkûkê ragihand:
“Di bin zextên hinek aliyên siyasî yên Ereban ev projeyasa nehat rojevê û nehat xwendin.”
Nûnerê cotkarên navçeya Topizawayê ya Kerkûkê Satih Nasih anî ziman:
“Dengên gemar ên li Parlamentoya Îraqê ku rê li ber betalkirina biryarên Encûmena Serkirdayetiya Şoreşê ya hilweşiyayî digirin.
Hîn ji xewna dagirkeriyê şiyar nebûne û dixwazin dest dayînin ser mal û milkên xelkê.
Heger daxwazên me neyên bicihanîn, em dê li Kerkûkê dest bi xwepêşandan û greva giştî bikin.”
Nêzîkî 50 sal berê rejîma Beasê bi sedan donim erd ji cotkarên Kurd standibûn û beşek ji wan dabûn Erebên hawirde û yên din jî dabûn wezaretên Îraqê.
20 sal in hewl tên dayîn ku biryar werin pûçkirin.
