Swêdê hejmarek ji zarokên çekdarên DAIŞê ji Rêveberiya Xweser wergirtin
Hewlêr (Rûdaw) - Şandeke Wezareta Derve ya Swêdê serdana Rojavayê Kurdistanê kir û hejmarek jin û zarokên malbatên DAIŞî, ji Rêveberiya Xweser wergirtin.
Şandeke Wezareta Derve ya Swêdê serdana Rojavayê Kurdistanê kir û li bajarê Qamişlo, ligel Hevserokê Daîreya Pêwendiyên Derve Ebdulkerîm Omer civiya.
Şanda Swêdî ku bi serokatiya ji Saziya Karûbarên Konsulî û Yasaya Sivîl li Swêdê Frederic Florn bûye, mijarên girêdayî rewşa Sûriyê û Rojavayê Kurdistanê ligel berpirsên Rêveberiya Xweser gotûbêj kirin û hat gotin ku divê aloziya Sûriyê li gorî biryarên navneteweyî, û beşdarbûna hemû pêkhateyên gelê Sûriyê were çareserkirin.
Di hevdîtinê de, serokê şanda Swêd anî ziman ku hikûmeta welatê wî pir rêzê li karê Rêveberiya Xweser û gelê wê digire.
Di hevdîtinê de, gef û êrîşên Tirkiyê û grûpên çekdar ên alîgirên wê, li ser navçeyê hatin gotûbêjkirin.
Yek ji mijarên girîng di gotûbêjan de, mijara DAIŞ û terorê bû, herwiha rewşa Kampa Holê û malbat û zarokên DAIŞê.
Serokê Şanda Swêd Frederic Florn got: “Hêvî dikim hûn rê bidin mim ku ji ber hikûmeta Swêdê ve bibêjim em pir rêzê li karê Rêveberiya Xweser û gelê wê û qurbaniyên wê di vî şerê li dujî terorê de digirin. Em we wekî hevpar dibînin û em li kêlek hev in di vî şerî de. Ev nameyeke pir girîng e dixwazim bigihînim we. Em di rewşa dijwar ku hûn rûbirûyê wê dibin digihêjijn, û em pir kêfxweş in bi hevkariya ligel we.”
Di heman çarçoveyê de, şanda Swêdî hejmarek jin û zarokên malbatên DAIŞî, ji Rêveberiya Xweser wergirtin.
Li gorî amarên berdest, li kampên bakur û rojhilatê Sûriyê 6000 zarok û 3000 jin ên DAIŞê hene, ji wan 600 zarok û 300 jin ji welatên Yekîtiya Ewropa ne. Sala 2020, 143 zarok û 7 jin ji bo welatên wan hatine radestkirin.
Heta niha, bêhtirî 10 welatan hejmarek ji jin û zarokên çekdarên DAIŞî ji Rêvewberiya xweser wergirtine, ji wan Rûsya, Fransa, Almanya, Belcîka, Elbanya, Swêd, Holanda, Finlanda, Ozbekistan, Filestîn, Mexrib û Sûdan.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse