Ebdulkerîm Saroxan: Projeyeke nû li ber me ye

Qamişlo (Rûdaw) - Encûmena Niştimaniya Kurd li Sûriyê (ENKS) û Partiya Yekîtiya Demokratîk (PYD) ku bi serpereştiya Amerîkayê hevdîtinên rasterast pêk tînin, li ser mijarên siyasî li hev kirin. Şêwirmendê PYDê jî dibêje, “Niha dema rêkeftinê ye ji ber ku xelk bi hewce ne, em li beramber projeyek nû ne ji bo sedsala bê."

Di şerê deverê de ne tenê 11 hezar kes hatin kuştin, 400 hezar Kurd jî di navxweya Rojavayê Kurdistanê de koçber in, bi zorê ji malên xwe derketine û pêwistiya wan bi rêkevtinekê heye da ku vegerin malên xwe, ji bo yekem car jî di elfebaya siyasî li deverê, herdû aliyên kurdî danûstandinên rasterast li ser axa Rojava dan destpêkirin.

Amerîka ku di çarçoveya hevpeymaniya navdewletî li deverê ye, bi cûda, her yek ji PYD û ENKSê re civiya û reşnivîsek ji bo çawaniya birêvebirina deverê di encama wan civînan de amade kir û di civîneke hevbeş de arasteyî herdû aliyan kir.

Kawa Ezîzî, Endamê Encûmena Şêwirdarî ya PDK-Sê, dibêje, “Biryara siyasî ihtîkar kirine, biryara siyasî û abûrî û leşkerî û istiratîcî ihtîkar kirine, ev yek qebûl nabe divê lêvegerek siyasî hebe.”

Ji bo gotûbêjkirina reşnivîsa Amerîkayî ku xalên wê gelek dişibin xalên rêkeftina Duhokê, heya niha herî kêm her du alî çar caran li bingeheke serbazî civiyan. Niha gotûbêj li ser yekalîkirina nêrîna siyasî tê kirin.

Ebdulkerîm Saroxan, Şêwirmendê PYD, “Niha dema rêkeftinê ye ji ber ku xelk bi hewce ne, em li beramber projeyek nû ne ji bo sed sala bê. Ji aliyê Amerîka, Rûsya û welatên Ewropayê ve projeyek nû li Rojhilata Navîn çê dikin. Eger em ne yek bin wê cihên me tune bin.”

Mijara ku herî zêde nakokî li ser heye, mana ENKSê di nava opozisyonê de ku PYD xwe bi xeta sêyem dide naskirin, lê ENKSê dibêje xeta sêyem li Sûriyê tune ye, herwiha mijara vegera pêşmergeyên Roj xaleke din ji nakokiyan e ku biryar e di rojên bê de gotûbêj li ser wan bê kirin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger