Hewlêr (Rûdaw) – Li 8 parêzgehên Tirkiye û Bakurê Kurdistan di xwepêşandanên li dijî qeyûman de 140 kes hatin desteserkirin.
Birêvebiriya Giştî ya Ewlehiyê ya Tirkiyeyê ragihand ku li 8 parêzgehên Tirkiye û Bakurê Kurdistan di xwepêşandanên li dijî qeyûman de 140 kes hatin desteserkirin.
Birêvebiriyê diyar kir ku ew bi hinceta birîndarkirina 16 polîsan û 2 kesan hatine desteserkirin.
Her wiha li ser 75 hesabên torên civakî jî karûbarên yasayî hatine destpêkirin.
Roja duşemê bi biryara Wezareta Karên Navxwe ya Tirkiyeyê li ser şaredariyên Mêrdîn, Êlih û Xelfetiyê yên Bakurê Kurdistanê qeyûm hatin tayînkirin.
Xelkê Bakurê Kurdistanê wekî karvedan “li dijî destdanîna li ser îradeya xwe” dest bi xwepêşandanan kir û xwepêşandan heta niha jî didomin.
Gelek caran mudaxele dikin
Hêzên ewlehiyê gelek caran mudaxele dikin û şkenceyê li xwepêşanderan dikin.
Her wiha hejmareke zêde ya welatiyan jî tên desteserkirin.
Birêvebiriya Giştî ya Ewlehiyê ya Tirkiyeyê di daxuyaniyekê de ragihand ku di “bûyerên civakî” de li parêzgehên Mêrdîn, Êlih, Riha, Wan û Amedê yên Bakurê Kurdistanê û li bajarên Stenbol, Antalya û Edeneyê yên Tirkiyeyê 140 kes hatine desteserkirin.
Birêvebiriyê îdia kir, ew 140 kes bi hinceta ku di xwepêşandanan de 16 endamên hêzên ewlehiyê û 2 kes birîndar kirine hatine desteserkirin.
Birêvebiriyê her wiha eşekere kir ku wan derbarê 75 hesabên torên civakî de jî bi hinceta “belavkirina parvekirinên provakatîv” karûbarên yasayî dane destpêkirin.
Li gorî daxuyaniyê tîman 140 kesên ku li 8 parêzgehan hatin desteserkirin birine birêvebiriyên ewlehiyê û karûbarên wan ên yasayî hatine destpêkirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse