Şaşiyek çêbû. Tika ye paşê dîsa hewl bide.
Komcivîna DEM Partiyê li Mêrdînê bû / Wêne: Ji dîmenan
Mêrdîn (Rûdaw) – Parlamenterê DEM Partiyê yê Mûşê Sirri Sakik derbare tayînkirina qeyûman got, “Eger ku silhê dixwazin, bila xeletiya xwe sererast bikin”
DEM Partiya ku her hefte civîna koma partiya xwe li Parlamentoya Tirkiyeyê dikir, ji ber tayînkirina qeyûman a li ser şaredariyan, vê carê civîna xwe li ber Şaredariya Bajarê Mezin a Mêrdînê kir.
Civîn li baxçeyê ber Şaredariya Mezin a Mêrdînê, bi beşdariya Hevserokên DEM Partiyê Tuncer Bakirhan, Tulay Hatîmogullari û parlamenteran pêk hat.
Her du hevserokan li Mêrdînê ji bo rewestandina qeyûman bang kir.
Bakirhan, ji desthilatê xwest ku di dema herî zû de qeyûmên ku danîne rake.
Hevserokê Giştî yê DEM Partiyê Tuncer Bakirhan got, “Birêz Bahçelî, madem tu çareseriyê dixwazî, pêşî dev ji vê feraseta xwe ya danîna qeyûman berde.
Madem tu çareseriyê dixwazî pêşî tecrîdê rake, madem çareseriyê dixwazî hiqûqê pêk bîne.
Madem çareseriyê dixwazî wê çaxê qeyûmê li Mêrdînê vekişîne.”
Gelek parlamenterên DEM Partiyê û parlamenterên fraksiyonên cuda ku bi DEM Partiyê re hevpeymanî kiriye jî di civînê de amade bûn.
“Bila xeletiya xwe sererast bikin”
Parlamenterê DEM Partiyê yê Mûşê Sirri Sakik jî got:
“Em dixwazin ew vê xeletiya xwe sererast bikin. Bila bêjin me xeletî kir.
Eger ku silhê dixwazin, eger ku aştiyê dixwazin, eger ku dibêjin li dinyayê rewşa Tirkiyeyê ne baş e, gerek rûnên û dev ji van polîtîkayên xwe berdin.
Gelê Kurd van polîtîkayên wan, van qeyûmên wan qebûl nake.”
Gelek Mêrdînî jî di civîna koma DEM Partiyê de amade bûn. Ew jî li hemberî danîna qeyûman ne razî bûn.
“Bi zorê ji me distînin”
Xelka Mêrdînê Naîle Erolê got, “Niheqî ye, zilm e. A me ye, ji me distînin. Bi zorê ji me distînin.
Ma ne niheqî ye? Bi şev tiştekî dibêjin, bi roj tiştekî din dikin.”
Nîşteciha Mêrdînê Zuhal Gumuştanê jî got:
“Em li dûv îradeya xwe ne. Danîna qeyûman şaş e. Em vê yekê şaş dibînin û ji ber vê yekê em li vir in.
Em nadin yanî ya me ye. Şaredarî ya me ye.”
Welatî Nezîr Aslan jî got, “Em vê zilmê qebûl nakin, em van qeyûman qebûl nakin. Şaredarî şaredariyên me ne.”
Roja duşemê Wezareta Karên Navxwe ya Tirkiyeyê qeyûm danî ser şaredariyên Mêrdîn, Êlih û navçeya Xelfetiyê ya Rihayê.
Di serî de DEM Partî, gelek partiyên mixalefetê jî li hemberî danîna qeyûman ne razî ne.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse