Dûpişk digirtin, 387 hezar lîre ceza lê hat birîn
Hewlêr (Rûdaw) - Li navçeya Heranê ya parêzgeha Rihayê ya Bakurê Kurdistanê 387 hezar lîre ceza li kesekî ku dûpişk digirtin hat birîn.
Li Rihayê kargehên jehra dûpişkan hene û ev sektor ji bo hinek kesan bûye deriyê debarê.
Xwediyê kargehan û hinek kes bi taybetî havînan gund bi gund digerin û dûpişkan digirin.
Parêzgariya Rihayê ragihand, tîmên Parastina Jîngehê ya Fermandariya Cendirmeyan li gundê Tucariyê yê Heranê otomobîlek rawestand û lê geriyan.
Di otomobîla ku şofêrê wê Y.Y. bû de di qutiyeke plastîkî de 270 dûpişkên zindî hatin dîtin.
Dûpişk ji Y.Y. hatin standin û dê careke din wan berdin jîngehê.
Ji ber ku bi awayekî neyasayî dûpişk girtine 387 hezar lîre ceza li Y.Y. hat birîn ku dike 11 hezar dolar.