Hewlêr (Rûdaw) - Jineke 27 salî ya bi navê Avestayê, ket Çemê Tengatorê ya li navçeya Mêrgesorê û winda bû.
Bavê keçikê li berava çem çok vedan û bi dengekî bilind hawar kir:
“Ey rûbar Avestaya min bide min.
Avesta, Avesta... Xwedêyo, canê wê li bin kîjan kevirî be, Avestaya min li min vegerîne!”
Bûyerê doh danê sibehê saet 09:50an rû daye.
Fexredîn Berzinciyê apê Avestayê behsa kêliya bûyerê kir û got:
“Kek Husên li gel jinbira xwe û mêvanekî din wê deverê peya bûne.
Ji bo wênegirtinê çûye ser kevirekî û lingê wê şemitiye.
Birayekî xwestiye wê bigire lê ji ber lezî û sermaya avê, nikariye wê rizgar bike.”
Bilindiya asta ava rûbarê û barana berdewam karê tîman ji bo dîtina termê Avestayê dijwar kir.
7 tîmên parastina sivîlan li gel malbata Avestayê û xelkê deverê gav bi gav nava çem digerin.
Qaymeqamê Mêrgesorê Xefûr Ehmed da zanîn:
“Ji dema rûdana bûyerê ve, 7 tîmên parastina sivîlan a Birêvebiriya Şaristaniyê ya Soranê, Parastina Şaristaniyê ya Mêrgesorê û du tîmên din ên avjeniyê li pey termê wê jina ku xeniqî digerin.
Înşalah em kêmasiyê nakin û cenabê Mela Mistefa Barzanî jî raspartiye ku em tiştê pêwîst ji bo dîtinê bikin.”
Avesta mamoste bû û tevî malbata xwe ji Hewlêrê ji bo gerê çûbû devera Barzanê lê seyrana malbatê bûbû şîn.
