Li Qendîl, Gare û Metînayê bombebaran
Hewlêr (Rûdaw) – Balafirên şer ên artêşa Tirkiyeyê, şeva borî li Başûrê Kurdistanê 5 herêm bombebaran kirin.
Balafirên şer ên Tirkiyeyê şevê din herêmên Qendîl, Xakurk, Asos, Gare û Metînayê bi awayekî dijwar bombebaran kirin.
Qaymeqamê qezaya Mawetê ya Silemaniyê Kameran Hesen ji Tora Medyayî ya Rûdawê re got, “Balafirên şer, şevê din derdora gundê Basawê û Geleliyê 4 caran bombebaran kirin.”
Hevserokê Şaredariya Binarê Qendîlê Dilşêr Îbrahîm jî da zanîn ku balafiran derdora gundê Êndizeyê di maweyê saetekê de 3 caran bombebaran kiriye.
Li aliyê din, Wezareta Parastinê ya Tirkiyeyê jî ragihand ku balafirên wan li herêmên Qendîl, Xakurk, Asos, Gare û Metînayê 22 cihên cuda bombebaran kirine.
Artêşa Tirkiyeyê, piştî teqîna li Enqereyê êrişên xwe yên li Başûrê Kurdistanê zêde kirine.