-
Hewlêr (Rûdaw) - Helîkopter û balafirên F-16 û topxaneya artêşa Tirkiyê sînorê navçeya Amêdiyê ya ser bi parêzgeha Duhokê ve bordûman kirin û gerîlayên PKKê jî bersiva êrîşan dan.
Rêveberê Ofîsa Rûdawê li Duhokê, Nasir Elî ragihand, derdora gundên Sora Sigêrê û Kanê li binarê çiyayê Metîna ku dikeve qeza Amêdiyê 10 saetan li ser hev ji aliyê artêşa Tirkiyê ve hatine bordûmankirin.
Li gor agahiyan, li herêmê di navbera leşkerên Tirkiyê û gerîlayên PKKê de jî şer derketiye û gerîlayên PKKê bi doşkayê bersiva êrîşan dane.
Niştecihekî gundê Sergelê, Remzî Sergelî ji Rûdawê re axivî û ragihand ku ew nêzîkî kîlometrekê dûrî devera şer in û dengê bombebaranê û doşkeyên gerîlayên PKKê nêzîk tê bihîstin.
Remzî Sergelî got, “Tirkiyê bi firokeyan dest bi bordûmana deverê kir û paşê di nîveşevê de topbarana deverê destpê kir ku nêzîkî 10 demjimêran dom kir û heta sibeha îro jî berdewam bû.”
Cihê ku hatiye bombebarankirin, gelek nêzîkî gundên Sergelî, Guwanî, Berçî, Kanî û hejmarek gundên din e.
Xelkê gundên nêzîkî devera şer dibêjin ku şeva bihorî xew neketiye çavên wan û jiyana wan di metirsiyê de ye.
Rêveberê Ofîsa Rûdawê li Duhokê, Nasir Elî dibêje, ji ber cihê şer û bordûmanê nêzî navenda qeza Amêdiyê ye, nişteciyên bajêr dengê bordûmanê û teqeyan bihîstine û xelkê gundên derdorê jî ji tirsa û bo parastina canê xwe bo demekê malên xwe vala kirine.
Remzî Sergelî niştecihê gundê Sergeliyê ji Rûdawê re dibêje, “nêzî du salan e artêşa Tirkiyê sînorê gundê me dike armanc û di du heftiyên bihorî de jî êrîşên xwe li vî sînorî zêdetir kirine û ji duh ve bi nêzî 100 gulleyên topê dever kiriye armanc.”
Qeymeqamê Amêdiyê Warşîn Selman jî derbarê şer û bordûmanan de ji Rûdawê re ragihand, “gundên Sigêrê û binarê Çiyayê Metîna hatine bordûmankirin, ji ber dengê bordûmanê xelkê herêmê gelek tirsiyane.”
Artêşa Tirkiyê ji 17ê Nîsana îsal ve operasyoneke nû li dijî PKKê bi navê Operasyona Pence-Kilîd dest pê kiriye ku heta niha berdewam e.
Operasyona Pence-Kilîd, navçeyên Metîna, Zap û Avaşîn-Basyanê yên di nav axa Herêma Kurdistanê de li xwe digire.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse