Hewlêr (Rûdaw) - Li parêzgeha Şirnexê ya Bakurê Kurdistanê polîsekî zarokeke 17 salî û jineke 23 salî tacîz kirin.
Xelkê parêzgehê rijiya ser kolanan û bûyer protesto kir.
Li gorî Ajansa Mezopotamyayê, şeva borî li navenda bajarê Şirnexê, dema zaroka 17 salî ya bi nave Z.S û jina 23 salî ya bi navê Z.A. ji kargeha xwe ya li nêzîkî xaçerêya Şaredariyê derdiketin, polîsê bi navê Ugur Demîrtaş ew tacîz kirin.
Keça 17 salî û jina navborî agahî da malbatên xwe û malbatê wan di demekî kurt de çûn cihê bûyerê.
Piştre di navbera wan û polîs Ugur Demîrtaş de nîqaş derket.
Polîsê navborî vê carê piştî nîqaşê bi çeka xwe gule berî hewayê da û ji cihê bûyerê reviya.
Lê di demek kurt de ji aliyê kesên li derdorê ve hate girtin.
Li ser agahdarkirinê tîmên polîsan çûn cihê bûyerê û hevkarê xwe yê ku keçek û jinek tacîz kirine desteser kir.
Polîsê navborî piştî karûbarên îfadeyê bi daxwaza girtinê dewqî dadgehê hat kirin lê ji aliyê dadgehê ve bi mercê kontrola dadî hate berdan.
Tacîza polîs a li zorok û jinekê, di nav xelkê parêzgehê bû sedema nerazîbûnan.
Xelkê Şirnexê li navenda bajêr bi meşekê bûyer protesto kir û xwest ew polîs bê girtin.