Hewlêr (Rûdaw) - Partiya Demokrat a Kurdistanê - Bakur (PDK-Bakur) biryara yekîtiyê da.
PDK-Bakurê ragihand ku di navbera aliyên PDK-Bakurê de li ser esasê pêkanîna yekîtiya rêxistinî ya partiyê dan û standin û di encamê de biryara yekîtiyê wergirtin.
Herwiha PDK- Bakurê da zanîn ku du aliyên PDK-Bakurê gihane wê bîr û rayê ku divê PDK-Bakur di demek nêzîk de yekîtiya xwe ya rêxistinî pêk bîne û bi kongreyek giştî vê yekîtiyê mîsoger bike.
PDK-Bakurê li ser biryara yekîtiyê daxuyaniyeke nivîskî belav kir.
Partiya Demokrat a Kurdistanê - Bakur di daxuyaniya xwe de wiha got:
“Demeke dirêj e ku di navbera aliyên PDK-Bakurê de li ser esasê pêkanîna yekîtiya rêxistinî ya partiyê dan û stendin berdewam bû. Cihê kêfxweşî û şanaziyê ye ku îro ev pêvajo gihaye qonaxeke bilind û biryara yekîtiyê hatiye standin.
Rayedar û alîgirên du aliyên PDK-Bakurê gihane wê bîr û rayê ku divê PDK-Bakur di demek nêzîk de yekîtiya xwe ya rêxistinî pêk bîne û bi kongreyek giştî vê yekîtiyê mîsoger bike.
Em her du aliyên PDK Bakur gihaştine wê bîr û rayê ku divê PDK-Bakur bi siyaseteke serbixwe û bi berpirsiyariyeke neteweyî û Kurdistanî, bi destpêk û rûpeleke nû xwe bîne ser hev û bi xebata xwe hêviyên gelê Bakurê Kurdistanê û tevgera azadîxwaza miletê Kurd geştir û xurttir bike.
Em hewl didin û dixwazin bi kongreyeke giştî hemî kes û aliyên ku xwedî li mîrata PDKTyê ya 1965an û hetanî îro derdikevin bînin cem hev û bi Partiyeke xurt ruh û giyanê kedkar û cangoriyên PDK-Bakurê şad bikin. Em vê helwestê wekî gaveke dîrokî bi nav dikin.
Eşkere ye ku dema burî zirareke mezin da PDK Bakurê û tevgera sîyasî bi şêweyek gistî. Lewra, bi navê her du aliyên PDK Bakur, em xwe wekî yek ji şirîkên lawazkirin, hêvîşikandin û bê alternatîf hîştina Bakurê Kurdistanê dibînin û bêyî ku terefekî din gunehbar bikin, lêborîna xwe ji miletê Kurd dixwazin.
Hêjayê gotinê ye ku aliyekî PDK-Bakur li gel hemî şêweyên pêwendî, daxwaz û bangên me, mixabin ku di derbarê mijara yekîtiyê de tu bersivek fermî diyar nekiriyê û di heyva Nîsana 2024an de bi logoyeke cûda daxûyaniyek belav kiriye.
Banga me li hemû kedkar û alîgirên ku li mîrata PDK-Bakurê xwedî derdikevin ev e:
Werin em bi hev re ji vê rewşa aloz a li Bakurê Kurdistanê re bibin derman. Em bi hev re rêxistin û siyaseta PDK-Bakurê xurttir bikin û doza neteweyî li bakurê welatê xwe bihêztir bikin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse