Nêçîrvan Barzanî: Em dê hewl bidin Şingal bibe parêzgeh

Duhok (Rûaw) – Serokê Herêma Kurdistanê Nêçîrvan Barzanî ragihand ku divê li  Iraqê û li ser asta navdewletî jî karesata Kurdên Êzdî weke cenosayda bê naskirin û Kurdên Êzdî bêne qerebûkirin. Nêçîrvan Barzanî got ku ew niha hewl didin navçeya Şingalê bibe parêzgeh. 

Li bajarê Duhokê îro Yekşemê (04.08.2019) merasîma bibîranîna salvegera komkujiya Şingalê bi amadebûna Serokê Herêma Kurdistanê Nêçîrvan Barzanî, Serokwezîrê Herêma Kurdistanê Mesrûr Barzanî û Seroka Parlementoya Kurdistanê Rewas Fayeq, Nûnera Taybet a Sekreterê Giştî yê Neteweyên Yekbûyî Bo Karûbarê Iraqê Jeanine Hennis-Plasschaert, Mîrê Êzidiyên Kurdistanê û Cîhanê Mîr Hazim Tehsîn Beg û nûnerên çend welatên ku nûnertiya wan li Herêma Kurdistanê hene û çend kesayetan hat sazkirin.

Serokê Herêma Kurdistanê Nêçîrvan Barzanî di gotara xwe de ragihand, cenosayda ku DAIŞê bi ser Kurdên Êzidî aniye, di dîrokê de tiştekê bê mînak e û di rojên yekem ên wê êrîşê de 2936 jin û zelam û zarokan canê xwe ji dest dan û hemû di gorên bi komî de hatine binaxkirin.

Nêçîrvan Barzanî diyar kir ku niha 80  gorên bi kom û bi dehan gorên yek kesî hatine dîtin û 2 hezar 745 zarok êtîm bûne û herwiha 68 mezarên Kurdên Êzdiyan jî hatine teqandin.

Barzanî herwiha got: Em baş wê yekê dizanin ku armanca dijmnina bê omêdkirin û derxistin Kurdên Êzdiye ji ax û welatê bav û kalên wan û têkdana bi hevre jiyana xelkê Kurdistanê ye. Dijmin dixwazin Kurdên Êzdî derbeder bikin û kultor û ziman û axa xwe bi hêlin, lê em dê alîkar bin ku hemû welatiyên Kurdên Êzdî li welatê xwe li Kurdistanê bimînin.”

Serokê Herêma Kurdistanê di heman demê de ragihand ku wan ofîseke taybet ji bo rizgarkirina revandiyên Kurdên Êzdî vekiriye û heya niha 2 hezar û 225 jin û keçên û hezar û 84 zelam û kurên  Kurdên Êzdî hatine rizgar kirine.

Serokê herêma Kurdistanê Nêçîrvan Barzanî di derbarê biryar parlamentoya Kurdistanê  ku roja 3 tebaxê bi roja komkojiya Kurdên Êzdî dayiyar kirye ragihand, biryareke cihê xwe de ye û divê  li Iraqê û li ser asta navdewletî jî ev karesate weke cenosay bê naskirin.

Barzanî herwiha da zanîn ku ew niha hewl didin navçeya Şingalê bibe parêzgeh û got: “Girîng e ku hikûmeta Herêma Kurdistanê û hikûmeta federal a Iraqê ji bo çareserkirina pirsa Şingalê hevkariyê bikin. Ji bo pêşxistina herêmê em dê bi piştevaniya Neteweyên Yekbûyî û civaka navnetewî fonekê pêk bînin.

• Parve bike li ser
• Share on Facebook
• Share on Twitter
• Share on Whatsapp
• Share on Telegram
• Share on Viber
• Share on Messenger