Hewlêr (Rûdaw) - Li parêzgeha Şirnexê, hemû cure çalakî, meş, civîn û xwepêşandan 15 rojan hatin qedexekirin.
Herwiha têketina bajêr û derketina ji bajêr jî dê werin kontrolkirin.
Li bajarên Kurdan bi hincetên cuda, bi berdewamî çalakî û xwepêşandan tên qedexekirin.
Parêzgariya Şirnexê ragihand, ji bilî çalakî, bername û bîranînên fermî yên ku qeymaqamtî û saziyên sivîl li dar dixin û kongreyên partiyên siyasî û sendîkayan hemû cure çalakî ji 3yê Nîsana 2024an û pê de 15 rojan qedexe ne.
Daxuyaniya Parêzgariya Şirnexê wiha ye:
“Di çarçoveya armancên diyarkirî de hemû civînên vekirî û meşên xwepêşandanê, merasîmên pêşwazîkirin û oxirkirinê, daxuyaniyên medyayê yên ku sazî li derveyî avahiya xwe bikin, çalakiyên rûniştinê, mîtîng, vedana konan, kampanyayên îmzeyê, vekirina standan, merasîmên biaxspartinê yên bi girseyî, bîranîn, konser, şahî, belavkirina belavok û bidarvekirina pankartan li tevahiya parêzgehê ji 3yê Nîsana 2024an demjimêr ji 00:01ê heta 17ê Nîsana 2024an demjimêr 23:59an hatine qedexekirin.”
Parêzgariya îdia kir ku ew qedexe ji bo “parastina ewlehiya neteweyî, silametiya giştî, rêgiriya li ber tawan û her pêşhateke neyînî û parastina maf û azadiya kesên din” hatiye ragihandin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse