Hewlêr (Rûdaw) – PDK û YNKyê li ser sê xalên sereke li hev kir ku yek ji wan jî destnîşankirina parêzgarê Kurd ê Kerkûkê ye.
Şandeyên Partiya Demokrat a Kurdistanê (PDK) û Yekîtiya Niştimanî ya Kurdistanê (YNK) îro li Dabeşana Silêmaniyê civiyan.
Di şandeya PDKyê de Berpirsê Rêveberiya Polîtburoyê Fazil Mîranî, berdevkê partiyê Mehmûd Mihemed, Azad Berwarî, Cafer Emînkî û Elî Huseyîn cih girt.
Şandeya PDKyê li Silêmaniyê ji aliyê Serokê YNKyê Bafil Talebanî, Serokê Rêxistina Kerkûkê ya YNKyê Aso Mamend û Berdevkê YNKyê Sadî Ehmed Pîre ve hat pêşwazîkirin.
Her du partiyan piştî hilbijartinên herêmî yên 18ê Kanûna Pêşînê yên li Kerkûk, Mûsil û parêzgehên Îraqê cara yekem e civîneke bilind li dar xist.
Di hilbijartinên encûmenên parêzgehan de YNKyê li Kerkûkê 5 kursî û PDKyê jî 2 kursî bi dest xistin.
Li Mûsilê PDKyê 4 kursî û YNKyê jî 2 kursî bi dest xistin.
Her du partiyan piştî civînê daxuyaniyeke hevbeş da.
Di daxuyaniya hevbeş a Partiya Demokrat a Kurdistanê û Yekîtiya Niştimanî ya Kurdistanê de hat gotin:
“Di civînê de piştî nirxandin û guftûgokirina rewşa siyasî û aborî ya herêmê û pirsgirêkên neçareserkirî yên bi hikûmeta federal re bi giştî û budçe, debara jiyanê û mûçeyên karmendan bi taybetî û hilbijartinên encûmenên parêzgehan bi berçavgirtina berjewendiyên bilind ên neteweyî û niştimanî li ser 3 xalan lihevhatinek hat kirin.”
Li gorî daxuyaniyê, PDK û YNKyê li ser 3 xalan li hev kiriye:
“Her du alî di vê qonaxê de ji bo berjewendiya welatiyên parêzgeha Kerkûkê li hev kir, divê parêzgarekî Kurd ji bo xizmeta xelkê bajêr û bajarokan were destnîşankirin.
Her du alî hevdeng bûn ku erkê YNK, PDK û hemû aliyên Kurdistanî ye ku desthilata herêmê û destkeftên şoreş, têkoşîn û xwîna şehîdên Kurdistanê biparêzin.
Ji bo çareserkirina pirsgirêkên siyasî û aborî yên herêmê bi hikûmeta federal re di asteke bilind de, divê her du alî hewla çareserkirina pirsgirêkan bi giştî û jiyan, xizmetguzarî, budce û mûçeyên karmendan bidin.”
Şandeyên Partiya Demokrata Kurdistanê (PDK) û Yekîtiya Niştimaniya Kurdistanê (YNK) di civînê de ne
— RudawKurdi (@RudawKurdi) February 4, 2024
Şandeya PDKyê li Debaşana Silêmaniyê ji aliyê Serokê YNKyê Bafil Talebanî ve hat pêşwazîkirin#PDK #YNK #Kurdistan pic.twitter.com/2xyYdZlMqf
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse